Rýslan Berdenovke oq atqan kúdikti: Qysym men qyzǵanysh sebep boldy

TÚRKІSTAN. KAZINFORM - Shymkent qalasynyń qylmystyq ister jónindegi mamandandyrylǵan aýdanaralyq sotynda qala ákiminiń orynbasary Rýslan Berdenovke jasalǵan qastandyqqa qatysty basty sot protsesi jalǵasyp jatyr.

Sotta aıyptalýshy Ernar Jıembaıdan jaýap alyndy. Ol óz erkimen jumystan shyǵý týraly ótinishti qysymmen, ıaǵnı qylmystyq qýdalaý qaýpimen qorqytý arqyly jazdyrtqanyn málimdep, osy ustanymyn jalǵastyryp otyr.

Sonymen qatar, onyń aıtýynsha, janjalǵa qyzǵanysh sebep bolǵan.

Aıyptalýshynyń sózinshe, jary jıi Rýslan Berdenovti úlgi etip, ony «bulshyqetti, energııasy tasyp turǵan, bolashaǵy zor jigit» dep sıpattaǵan.

Jıembaıdyń aıtýynsha, Berdenov onyń jubaıyna erekshe kóńil bólip, áleýmettik jelidegi jazbalaryna «laık» basyp, maqtaý pikirler qaldyrǵan.

Sondaı-aq, jeke áńgime barysynda: «Óziń de blatnoısyń, áıeliń de sulý eken», – degen sózder aıtqan, bul jaǵdaı otbasynda jıi janjal týdyrýǵa sebep bolǵan.

Jıembaı taratqan málimetke qatysty Rýslan Berdenovtiń resmı ókili Jeńis Tynybek pikir bildirdi. Ol tórt balanyń ákesi Berdenovti jaqsy biletin adam retinde, ózgeniń jaryna qandaı da bir jazba jazýy múmkin degenge senbeıtinin jetkizdi.

Jıembaıdan jaýap alý aıaqtalǵannan keıin bul is boıynsha alǵashqy kýáger retinde feldsher Araı Qamytbekova sóz sóıledi. Onyń aıtýynsha, qylmys bolǵan sátte ol qurbysymen birge TikTok-qa vıdeo túsirip júrgen jáne oqıǵa ornyna jaqyn mańda bolǵan.

Qamytbekovanyń sózine súıensek, ol Jıembaıdy shabýylǵa deıin kórgen jáne ol kóńilsiz kúıde júrgen. Keıinirek atys daýysyn estigen boıda oqıǵa ornyna júgirip barǵan. Sol jerde Jıembaıdyń: «Óltiremin!» jáne «Ol meniń áıelim, seniń kesirińnen biz ajyrasyp jatyrmyz!» – dep aıqaılaǵanyn estigenin aıtty. Keıinirek ol Jıembaıdyń oqıǵa ornynan shyǵarylyp jatqanyn kórgen.

Rýslan Berdenov qanǵa malynǵan kúıde bolǵan, qoly men búıirinen jaraqat alǵan. Araı Qamytbekova oǵan alǵashqy medıtsınalyq kómek kórsetken.

Aıta keteıik, budan buryn Shymkenttegi mamandandyrylǵan aýdanaralyq qylmystyq ister jónindegi sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastalǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Al 25 sáýirde sheneýnikke oq atqan kúdiktiniń ákesi málimdeme jasady.

Rýslan Berdenovtiń aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.