Rýslan Berdenovke qastandyq jasaý isi boıynsha sotta psıhıatrııalyq saraptama qorytyndysy usynyldy

ShYMKENT. KAZINFORM — Shymkent qalasy ákiminiń orynbasaryna qastandyq jasaý isi boıynsha ótken úshinshi sot otyrysynda sot-psıhıatrııalyq saraptama qorytyndysy jarııalanyp, jańa kýágerlerden jaýap alyndy.

Saraptamaǵa qorytyndysyna sáıkes, aıyptalýshy Ernar Jıembaı sozylmaly psıhıkalyq aýrýmen, kemaqyldylyqpen aýyrmaıdy jáne buryn aýyrmaǵan. Ol tergeý men sot aldynda jaýap bere alady, májbúrli emdeýdi qajet etpeıdi degen qorytyndyǵa kelgen.

Sotta qosymsha kýáger retinde aıyptalýshynyń dosy, apparat basshysynyń kómekshisi Daýlet Kólbaı tyńdaldy.

— Ernarmen tanys bolǵanyma 10 jyldan asty. Bir mektepte oqyǵanbyz. Sol kúni maǵan habarlasty. Saǵat 17:00 shamasynda sóılestik, jaǵdaı surastyq. Eki apta buryn ekeýimiz birge túski as iship, qaıtyp kele jatqanda qurylys basqarmasynyń basshysy Oljas Tájibaevty kórip qaldyq. Sol jerde ol «ótinishińdi jaz» dep, Rýslan Arysbekulynyń sózin jetkizdi. Ernar: «Ne úshin jazýym kerek?» — dedi. «Jazbasań, basqa ispen ketesiń» degen sóz aıtyldy. Birinshi jınalystan keıin syrtqa shyǵyp sóılestik, kóńil-kúısiz edi. «Jumystan ket dep jatyr, kıimime eskertý jasady» dedi. Ary qaraı tolyq ashyp aıtpady, — dedi kýáger.

Qurylys basqarmasynyń basshysy Oljas Tájibaev beınebaılanys rejıminde jaýap berdi. Ol Jıembaıǵa Berdenovtiń sózin jetkizgenin rastady.

— Jınalysta Rýslan Arysbekuly bul qyzmetker jumystan bosatylýy kerek ekenin aıtty. «Ózi ótinish jazady nemese tergeýge alynady» dedi. Men muny tek Ernarǵa jetkizdim, — dedi ol.

Tájibaevtyń aıtýynsha, Jıembaıdyń jumysyna qatysty eshqandaı shaǵym bolmaǵan.
Sot zalynda Rýslan Berdenovtiń aýrýhanadan bergen ekinshi jaýabynyń beıneúzindisi kórsetildi. Sýdıa Ábinur Qarabaev jábirlenýshiniń sot otyrysyna qatysý kerektigin eskertti.

— Eger dúısenbi, 18 tamyzda jábirlenýshi sotqa onlaın bolsa da qatyspasa, jaýap tolyqtaı qaıta kórsetiledi, sodan keıin taraptardyń jaryssózi bastalady, — dedi ol.

Sondaı-aq ákimdiktiń ishki baqylaý kameralarynan alynǵan jazbalar kórsetildi. Onda qastandyq jasalǵannan keıingi áreketter, sonyń ishinde polıtsııa men krımınalısterdiń kelgen naqty ýaqyty beınelengen.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.