Rýslan Berdenov sotta jaýap berdi

ShYMKENT. KAZINFORM — Shymkent qalasy ákiminiń orynbasary Rýslan Berdenovke jasalǵan qastandyq isi boıynsha sot tyńdalymy jalǵasyp jatyr.

Búgingi sot protsesine jábirlenýshi Rýslan Berdenov onlaın rejımde qatysty.

Ol óz sózinde polıgraf arqyly da jaýap berýge daıyn ekenin jetkizdi.

— Ernar Jıembaıdy ómirimde nebári úsh ret qana kórdim. Onyń ekeýi — jumysqa baılanysty jınalystarda, úshinshisi — maǵan oq atqan sáti, — dedi Berdenov.

Ol alǵashqy kezdesýdi bylaı sıpattady:

— Jınalysqa «Turǵyn úı Shymkent» JShS bashysy Ernar Jıembaıdy shaqyrǵanbyz. Inspektor Asanbaı men Jıembaı birge keldi. Biraq Jıembaı qarjynyń qaıda jumsalǵany, qandaı merdigerler jumys istep jatqany, qandaı tenderler ótkizilgeni, qansha úıge jumys júrgizilgeni jóninde naqty aqparat bere almady. Tipti ınspektor oǵan «mynany aıt, anany aıt» dep otyrdy. Keıin ekeýi meniń kabınetimde ózara daýlasyp ketti. Sol sátte men: «Biz senimen mundaı jaǵdaıda jumys isteı almaımyz», — dedim. Ol: «Kerek bolsa, jumystan shyǵa alamyn», — dedi. Men de «Onda jumystan shyǵa sal» dedim. Osylaısha jınalys aıaqtaldy.

Jábirlenýshiniń aıtýynsha, arada bir apta ótken soń ınspektor Asanbaı kelip, Jıembaıdyń qońyraý soǵyp, «bireýdi óltiremin nemese ózim ólemin» dep aıtqanyn jetkizgen. Biraq ol kezde Berdenov muny mán beretindeı jaǵdaı dep sanamaǵan.

Ekinshi kezdesýinde Jıembaı ákim orynbasarynyń kabınetine ózi suranyp kirgen.

— Ol menen «Bir eki bitpegen jumysym bar edi, bir-eki aıdan keıin jumystan ketýime bola ma» dep surady. Qarsy bolǵan joqpyn. Sondaı-aq, «Siz — meniń kýmırimsiz, otbasymyzben úlgi tutamyz» dedi. Qolymdy alyp, qoshtasyp shyqty. Sol kezde eshqandaı daý-damaı bolǵan joq, — dedi Berdenov.

Sonymen qatar ol kıim úlgisine baılanysty da eskertý jasaǵanyn atap ótti.

— «Etıket saqtamaısyńdar ma? dep bir eskertý jasadym. Sebebi, djınsy men aq fýtbolkamen kelip tur. Ákimshilikke, ákimniń orynbasaryna esep berýge kelip tursyńdar, kıim úlgisine qaramaısyńdar me dep eskertý jasadym, , — dedi ol.

Berdenovtiń aıtýynsha, eki kezdesýde de janjal bolmaǵan, kýágerler de bar, al sóılesken áńgimelerdi resmı kabınetterdegi tehnıkalyq jabdyqtar arqyly da rastaýǵa bolady.

— Eki kezdesýde de eshqandaı daý bolmady. Bul sózimdi polıgraf arqyly, detektormen de aıta alamyn. Ekinshi kezdesýimiz óte jaqsy ótti. „Biz sizdi kóremiz, otbasymyzben qaraımyz“, dep rahmetin aıtyp shyqty. Basqa artyq áńgime bolǵan joq. Birinshi kezdesýde kýáger Asanbaı. Ekinshi kezdesýde ekeýimiz aq boldyq. Biraq saıası qyzmetker bolǵannan keıin kabınette tehnıkalyq jadyqtar bolady, ony da kóterip kórýge bolady, — dedi Rýslan Berdenov.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.