Rýslan Berdenov isi: Kýáger Ernar Jıembaıǵa tártiptik jaza qoldanylmaǵanyn aıtty
ShYMKENT. KAZINFORM – Shymkentte kásipker Rýslan Berdenovke jasalǵan qastandyqqa baılanysty qylmystyq is boıynsha sot tyńdalymy jalǵasyp jatyr.
Kezekti protsesste kýáger retinde Shymkent qalalyq qurylys basqarmasynyń qurylys nysandaryna monıtorıng júrgizý bóliminiń basshysy Amanǵalı Kenjebekov pen qala ákiminiń orynbasary Rýslan Berdenovtyń kómekshisi Talap Rahymberdıevtiń jaýaby tyńdaldy.
Kýáger Kenjebekovtyń aıtýynsha, oqıǵaǵa deıin qurylys basqarmasynyń basshy orynbasary Erdáýlet Ájibaev odan «Turǵyn úı Shymkent» JShS basshysy Ernar Jıembaıdyń óz erkimen jumystan ketý týraly aryz jazǵan-jazbaǵanyn suraýdy ótingen.
– Men Jıembaıǵa habarlasyp, aryz jazý máselesin suradym. Ol «maǵan bir aı ýaqyt berilgen edi, boldy túsindim» dep jaýap berdi, – dedi Amanǵalı Kenjebekov.
Sondaı-aq ol jumysta kadrlyq is qujattar júrgizý ózine júktelgenin aıtty. Al, jalpy aıyptalýshy Ernar Jıembaıǵa qatysty tártiptik shara kórý nemese jumystan bosatý jóninde eshqandaı tapsyrma túspegenin jetkizdi.
Munan soń, qala ákiminiń orynbasary Rýslan Berdenovtyń kómekshisi Talap Rahymberdıev tyńdaldy. Ol Ernar Jıembaımen jınalystarda birneshe ret kezdeskenin, olardyń arasynda janjal nemese ashyq kelispeýshilik baıqamaǵanyn atap ótti. Degenmen bir jınalysta Jıembaıdyń slaıd-prezentatsııasy daıyn bolmaı, tehnıkalyq qıyndyqtar týyndaǵanyn jáne kıim úlgisiniń resmı talapqa saı bolmaǵanyn jetkizdi.
Kýágerdiń sózinshe, ekinshi kezdesýden keıin Jıembaı birneshe ret Berdenovpen tikeleı sóılesýdi surap, telefon arqyly baılanysqa shyqqan.
– Túste zvondaǵan kezde maǵan «Rýslanǵa bershi telefondy» - dedi. Men oǵan sýbordınatsııa saqtaýdy, durystap sóıleýdi eskerttim. Sebebin «ózim sóılesemin» - dep aıtty. Soǵan qaramastan, ol qaıta qońyraý shalyp, Berdenovtiń úıine barýy múmkin ekenin jetkizdi, - dedi kýáger.
Sot otyrysynda kýáger Jıembaıdyń jumystan ketý týraly bir aı merzim suraǵanynan habardar ekenin, onyń sebebin naqtylamaǵanyn jetkizdi.
Іs boıynsha sot tergeýi jalǵasyp jatyr.
Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.