Rýslan Berdenov «Respublica» partııasynan nege ketkenin aıtty
ASTANA. KAZINFORM – Burynǵy Májilis depýtaty, qazirgi Shymkent qalasy ákiminiń orynbasary Rýslan Berdenov «Respublica» partııasynyń teń tóraǵasynan ketýine qatysty resmı túsinik berdi.
- Men «Respublica» partııasynyń teń tóraǵasy retindegi mıssııamdy aıaqtaý jóninde sheshim qabyldaǵanymdy habarlaımyn. Bul sheshim sanaly túrde jáne ózime qatysty birqatar obektıvti sebepke baılanysty qabyldandy, - dedi Rýslan Berdenov.
Odan ári Shymkent ákiminiń orynbasary atalǵan jaıttyń sebebin túsindirdi.
- Birinshiden, belgili bolǵandaı, qazir men Shymkent qalasy ákiminiń orynbasary qyzmetin atqaryp kelemin. Qoldanystaǵy zańnama talaptaryna sáıkes, memlekettik qyzmetti saıası partııadaǵy jetekshilik qyzmetpen qatar alyp júrýge jol berilmeıdi. Men zań talaptaryn qurmetteımin jáne ony qatań saqtaımyn. Ekinshiden, partııanyń ishki qaǵıdattaryna sáıkes, partııa músheleri memlekettik organdarda laýazymdy qyzmet atqara almaıdy. Biz saıası úderisterge qatysý partııa ishindegi bılik qurylymymen aralaspaýy tıis dep sanaımyz. Úshinshiden, qazirgi tańda óz densaýlyǵymdy qalpyna keltirýge basa nazar aýdaryp júrmin. Men árdaıym jumysyma joǵary jaýapkershilikpen qarap keldim, budan keıin de memlekettik qyzmettegi laýazymymdy óz deńgeıinde atqarýym kerek. Sondyqtan da dál qazir ózimdi jaqsy seziný úshin kúsh-qýatymdy soǵan salýdamyn. Men partııa jolynyń bastaýyndaǵy qundylyqtar men ıdeıalarǵa adal bolyp qala beremin jáne «Respublica» komandasyna aldaǵy ýaqytta zor tabys tileımin. Birge jumys istegen áriptesterime shyn júrekten alǵys aıtamyn, - dep túsindirdi R.Berdenov.
Buǵan deıin Rýslan Berdenovtiń «Respublica» partııasynyń teń tóraǵalyǵynan ketkeni týraly resmı habarlaǵan edik.
Aıta ketsek, bıyl 24 aqpanda Rýslan Berdenov Shymkent qalasy ákiminiń orynbasary bolyp taǵaıyndaldy.
Artynsha Rýslan Berdenovtiń Májilistegi ókilettigi toqtatyldy.
Eske salsaq, bıyl 21 sáýirde Shymkentte qala ákiminiń orynbasary Rýslan Berdenovke qastandyq jasaldy. Ol aýyr jaraqattarmen aýrýhanaǵa jetkizilip, jedel túrde ota jasaldy.
Sondaı-aq Rýslan Berdenovke jasalǵan qastandyqqa qatysty qylmystyq is boıynsha tergeý aıaqtaldy.