Rýslan Berdenov densaýlyǵyna baılanysty sotqa qatysa almady
ShYMKENT. KAZINFORM — Sot ashyq formatta ótip jatyr.
Shymkenttegi mamandandyrylǵan aýdanaralyq qylmystyq ister jónindegi sotta qala ákiminiń orynbasary Rýslan Berdenovke qastandyq jasaý isi boıynsha basty sot protsesi bastaldy.
Sot jábirlenýshiniń sot otyrysyna jeke qatysýyn qamtamasyz etýdi tapsyrǵan bolatyn. Alaıda búgin Rýslan Berdenov sot zalynda joq. Onyń resmı ókili Berdenovtiń qazirgi ýaqytta aýrýhanada jatqanyn málimdedi. Ol aıaq pen keýde tusyndaǵy aýyrsynýǵa shaǵymdanǵan. Tamyz aıynda oǵan qaıta ota jasalýy josparlanyp otyr.
Aıyptalýshy Ernar Jıembaı 30 jasqa deıin eshkimge zııan keltirmegenin aıtyp, Rýslan Berdenovtiń sotqa qatysýyn qamtamasyz etýdi surady.
Berdenovtiń ókili onyń sot protsesine onlaın qatysý múmkindigin anyqtaýy tıis.
Búgingi sot otyrysy aıasynda aıyptalýshy Ernar Jıembaıdyń jubaıy Lýıza da kýá retinde suralmaq.
31 jastaǵy Ernar Jıembaıǵa Qazaqstan Respýblıkasy Qylmystyq kodeksiniń eki baby boıynsha aıyp taǵylyp otyr: 24-baptyń 3-bóligi («Qylmysqa daıyndalý jáne qylmysqa oqtalý») jáne 99-baptyń 1-bóligi («Adam óltirý»).
Aldyn ala tyńdaý barysynda Jıembaı istiń alqabılerdiń qatysýynsyz, sýdıanyń jeke qaraýynda ótýin talap etti. Sondaı-aq ol sot zalynda óziniń beınejazbaǵa túsirilýine qarsy ekenin málimdedi. Aıyptalýshynyń múddesin tórt advokat, onyń ishinde ákesi de qorǵap otyr.
Tergeý nusqasyna sáıkes, qylmysqa sebep bolǵan — Jıembaıdyń «Turǵyn úı Shymkent» JShS basshysy qyzmetinen bosatylýy. Bul týraly ótinishti Rýslan Berdenovtiń ózi emes, qurylys nysandaryn monıtorıngteý bóliminiń basshysy jetkizgen. Osydan keıin, aıyptaýshy taraptyń málimetinshe, Jıembaı alkogol satyp alyp, ony kóliginde ishken. Artynsha ákimdik ǵımaratyna qaıta oralyp, ańshy myltyǵymen Rýslan Berdenovke bes ret oq atqan.
Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz.
21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi.
Al 25 sáýirde sheneýnikke oq atqan kúdiktiniń ákesi málimdeme jasady.
Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.