Rýslan Ábdirazaqov: «Qazaqstan Barysyndaǵy» basty qarsylasym - aǵam Ulan Rysqul
29 mamyr kúni Almatydaǵy Balýan Sholaq atyndaǵy sport saraıynda qazaq kúresinen «Almaty barysy» týrnıri ótken bolatyn. Onda Rýslan Ábdirazaqov «Almaty barysy» atanyp, Astanada shildeniń 2-si kúni ótetin fınaldyq dodaǵa joldamany jeńip alǵan bolatyn.
Búgin Rýslan QazAqparat tilshisine suhbat berip, jarysqa daıyndyǵy jáne basty qarsylastary týraly aıtyp berdi.
- Rýslan, «Qazaqstan barysyna» daıyndyǵyńyz qalaı?
- Jaman emes. Daıyndyǵym óte jaqsy. Almatydaǵy oqýshylar saraıynda bapkerimiz ekeýmiz aıanbaı ter tógip jatyrmyz. Eń bastysy, fınalǵa deıin jattyǵý barysynda jaraqat alyp qalýdan aman bolsaq bolǵany.
- Qatelespesem, «Qazaqstan barysyna» 2013 jyly ǵana bir-aq ret qatysa almaı qaldyńyz. Qalǵan jyldary úzbeı qatysyp kelesiz. Ótken kúnderińizden qalǵan «áttegen-aılaryńyz» bar ma?
- Árıne, bar. Fınalǵa jetip turyp súringen sátim boldy. Fınalǵa jetpeı súringen sátim boldy. Bunyń barlyǵynyń ar jaǵynda bir «áttegen-aı» qalady. Biraq, «bir sátsizdik bir sabaq» demeı me? Bıyl ondaı ókinishterge jol bermeýge tyrysatyn bolamyn.
- Bıylǵy maqsatyńyz...
- Bıyl tek bas júlde úshin ǵana kúresemin.
- Basty qarsylastaryńyz týraly aıtyp ótseńiz.
- «Qazaqstan barysyna» jalpy 34 balýan qatysady. Onyń biri - ózimmin. Qalǵan 33-iniń barlyǵy - meniń qarsylasym. Onyń ishinde osaldary bolmaıdy. Ótkende bir áriptesterim «biz tek saǵan daıyndalyp jatyrmyz» dep qaldy. Sonda olardyń da basty qarsylastary men sııaqtymyn. Ózge balýandar men úshin daıyndalyp jatsa, men sol balýandar úshin daıyndalyp jatyrmyn.
- Sonyń ishinde ózińiz kimnen qaýiptenesiz?
- Tek, aǵam Ulannan.
- Eger fınalǵa deıin, ne fınalda jolyǵyp qalsańyzdar ne isteısiz?
- Meni osy suraq qatty oılandyryp júr. Qazir Alladan jatsam da, tursam da aǵamdy fınalǵa deıin jolyqtyrmasa eken dep tileımin. Jolyqtyrsa, tek fınalda kezdestirse eken deımin.
- 2010 jyly alǵashqy týrnırde aǵańyzǵa jol bergenińizdi jurt jaqsy biledi. Bıyl da jolyǵyp qaldyńyz delik, taǵy da jol beresiz be?
- Iá, ol jyly jol bergenim ras. Shyny kerek, ol kezde Ulan maǵan qaraǵanda babynda boldy. Onyń ústine, qazaqy tárbıe alyp óskendikten, aǵamnyń joly úlken ekenin túsindim. Sondyqtan, oǵan jolymdy berdim. Bapkerlerim de osyndaı sheshimge keldi. Baǵyna qaraı, sol týrnırde aǵam «tuńǵysh «Qazaqstan barysy» degen atqa qol jetkizdi. Endi, bıyl taǵy da jolymyz túıisip jatsa ne isteıtinimizdi bilmeımin. Onyń ústine men Almaty qalasynyń atynan synǵa tússem, ol Almaty oblysynyń namysyn qorǵaıdy. Buıyrtqanyn kóremiz. Fınalda jolyǵyp jatsaq, meniń óz tusynda jasaǵan inilik qurmetimdi bul joly aǵalyq izetimen qaıtaratyn shyǵar dep oılap qoıamyn (kúldi).
- Osyǵan deıin ekeýińizde Qyzylorda oblysynyń namysyn qorǵap keldińizder, nege bıyl birińiz Almaty qalasyna, ekinshińiz Almaty oblysyna aýysyp kettińizder?
- Syr óńiri qashanda biz úshin ystyq. Talaı tulǵalardy, talaı chempıondardy týdyrǵan óńir. Biz sportta úlken jetistikterge osy óńirde júrip qol jetkizdik. Alaıda aǵam ekeýimiz Almaty oblysynyń týmalarymyz. Qazir Syr óńirinde myqty-myqty balýandar ósip keledi. Sol jas balýandardyń jolyn bógemeı, olarǵa da múmkindik bereıik degen oımen burynǵy týǵan ólkemizdiń týynyń astyna qaıta oraldyq.
- Áńgimeńizge rahmet! Tek sáttilik joldas bolsyn.
