Rýs memleketi Ordaǵa salyq tólep turǵan – Vladımır Pýtınniń Taker Karlsonǵa suhbatynan
ASTANA. KAZINFORM – Reseı Prezıdenti Vladımır Pýtın amerıkalyq jýrnalıst Taker Karlsonǵa suhbat berdi. Kreml saıtynda jarııalanǵan osy suhbattyń qyzyqty tustaryn nazaryńyzǵa usynamyz.
Eki saǵattan astam ýaqytqa sozylǵan suhbat negizinen Ýkraınaǵa qarsy soǵys, janjaldy retteý keleshegi, NATO-nyń keńeıýi, «Soltústik aǵyn» gaz qubyrynyń jarylýy syndy ózekti taqyryptardy qamtıdy. Degenmen, sóz basynda RF Prezıdenti Reseıdiń qurylý tarıhyna keńinen toqtala kele Rýstiń Ordaǵa salyq tólep turǵanyn moıyndaıdy.
«…Munyń bári birige bastaǵan birtutas memlekettiń — Rýstiń ydyraýyna alyp keldi. Munda turǵan aıryqsha eshteńe joq, dál osyndaı jaıt Eýropada da boldy. Biraq ydyraǵan Rýs memleketi kezinde Shyńǵys han qurǵan ımperııanyń ońaı jemtigine aınaldy. Onyń murageri Batyı han Rýsqa kelip, is júzinde búkil qalany tonady, oırandady. Kıev, ózge de birneshe qala ornalasqan ońtústik bóligi derbestigin joǵaltyp alsa, soltústik qalalar egemendiginiń bir bóligin saqtap qaldy. Ordaǵa salyq tólep turdy. Degenmen, egemendigin jartylaı saqtaı aldy», — dedi Vladımır Pýtın.
Evan Gershkovıch jáne Ýkraına jaıynda
Munan keıin «amerıkalyq arnaýly qyzmet» múddesine jumys istegeni úshin Reseı Federatsııasy aýmaǵynda tutqyndalǵan The Wall Street Journal jýrnalısine qatysty jaıt qozǵalǵan. Vladımır Pýtın Reseı tutqyn almasýǵa daıyn ekenin atap ótedi.
«Іs júzinde seriktesterimizdiń tarapynan qarsy qozǵalys bolǵan kezde muny jasaı alatynymyzdy joqqa shyǵarmaımyn. Men „seriktester“ degende, eń aldymen arnaýly qyzmet ókilderin meńzep otyrmyn. Olar bir-birimen baılanysta jáne osy taqyrypty talqylaıdy. Bizde bul problemany sheshpeý kerek degen tyıym joq. Ony sheshýge daıynbyz. Biraq, ol jerde arnaýly qyzmetter arasyndaǵy seriktestik arnalar arqyly talqylanatyn naqty sharttar bar», — dedi Reseı Prezıdenti.
Ýkraınadaǵy jaǵdaı jaıly aıta kele Vladımır Pýtın Reseıdiń esh ýaqytta kelissózden bas tartpaǵanyn sóz etedi. Ol erteli-kesh janjaldyń beıbit aıaqtalatynyna ári eki el arasyndaǵy baılanystyń qalpyna keletinine senimdi. Onyń atap ótýinshe, Máskeý men Kıev kelissóz barysynda eki jaq úshin ońtaıly kelisim jasaýǵa shaq qalǵan. Alaıda, Ýkraına Prezıdenti Vladımır Zelenskıı túptep kelgende oıynan aınyp qaldy.
«Ýkraınadaǵy janjaldyń qalaı aıaqtalatynyna qaramastan álem ózgeriske ushyraıdy», — dedi Reseı Prezıdenti.
Fashızm qaldyǵyn qurtý jaıynda
Sonymen qatar Vladımır Pýtın Reseıdiń Ýkraınada Gıtlermen ymyralas bolǵandardy ulttyq batyr jasaýǵa umtylysty boldyrmaýǵa tyrysatynyn sóz qyldy.
«Osy teorııa men tájirıbeni ómirde qaldyryp, ony saqtaýǵa tyrysatyn adamdardan qutylý qajet. Natsızmdi joıý degenimiz osy. Ystanbulda bul jaıynda ýaǵdalastyqqa qol jetti», — dedi reseılik kóshbasshy.
«Soltústik aǵyn» jaıynda
Onyń sózine qaraǵanda Reseı «Soltústik aǵyn» gaz qubyryndaǵy jarylysqa qatysty óz erekterin álemge usynbaıdy. Óıtkeni, «úgit-nasıhat soǵysynda Qurama Shtattardy jeńý óte qıyn».
«Bul jumysqa qatysýǵa bolady. Biraq, bul ózińe qymbatqa túsedi. Onsyz da ne bolǵany búkil álemge túsinikti», — dedi Pýtın.
ıAdrolyq soǵys qaýpi jaıynda
Suhbat barysynda amerıkalyq tilshi Vladımır Pýtınnen «Ýkraına janjaly jahandyq ıadrolyq soǵysqa alyp keledi dep qoryqpaısyz ba?» dep surady. Bul saýalǵa ol aqyldy adamdar munyń feık ekenin jaqsy túsinetindigin aıtyp, jaýap berdi.
Ilon Mask jaıynda
Sondaı-aq suhbat barysynda ónertapqysh ári bıznesmen Ilon Mask tóńireginde de áńgime órbidi.
«Qazirgi ýaqytta Ilon Mask AQSh-ta qandaı da bir adamnyń mıyna chıp engizdi dep aıtyp júr. Menińshe, Maskti toqtatý múmkin emes. Ol qalaı bolǵanda da ózi qajet dep sanaǵan isin jasaıdy. Degenmen, onymen qalaı bolsa da kelisý qajet, onyń kózin jetkizýdiń qandaı da bir ádisin izdeý kerek. Qalaı degende de bul protsesti zańdastyrý, qandaı da bir erejege baǵyndyrý úshin onymen ýaǵdalastyqqa qol jetkizgen jón», — dedi ol.
Vladımır Pýtın Mask jobasyn adamzat úshin janama qater dep atady. Óıtkeni, ol áskerı salada da qoldanylýy múmkin.
Mınsk kelisimi jaıynda
Áńgime Mınsk kelisimine oıysqanda Pýtın Reseıdiń Mınsk kelisimindegi óz bóligin oryndaýǵa daıyn ekendigin aıtty.
«Biz bul protsesti shuǵyl toqtatý, Mınsk kelisiminiń oryndalýy úshin Qurama Shtattardyń, eýropalyq elderdiń basshylaryna júgindik. Ashyǵyn aıtqanda, muny qalaı isteıtinimizdi bilgen joqpyn. Biraq, oryndaýǵa daıyn edim», — dedi RF Prezıdenti.
Ol kelisim Kıev úshin kúrdeli bolǵanyn aıtady. Donbas úshin kóptegen táýelsizdik elementteri kózdelgen.
Qytaımen yntymaqtastyq jaıynda
Taker Karlson Qytaımen qarym-qatynasqa toqtalyp, «odan qorqý qajet pe?» dep surady. Pýtın mundaı paıymǵa negiz joq ekenin atap ótti.
«Qytaımen yntymaqtastyq Reseı úshin qaýipti delingen málimdemeler bos úreıden basqa dym da emes. Eýropa munan da tyǵyz yntymaqtastyqta. Eýropalyqtardan surańyz, olar qoryqpaı ma eken?» — dedi Pýtın.
Reseıdiń NATO-ǵa kirýi jaıynda
Reseı Prezıdenti Máskeý NATO-ǵa kirý múmkindigine qyzyǵýshylyq tanytyp, Vashıngtonǵa zymyranǵa qarsy qorǵanys júıesin birlesip jasaýǵa usynys jasaǵanyn jetkizdi. Aıtýynsha, buǵan AQSh prezıdentteri qoldaý bildirgenimen olardyń ákimshilikteri bas tartyp otyrǵan.
«Túptep kelgende bizdi munan ary syrǵytyp tastady. Biz tipti qurlyqaralyq qashyqtyqtaǵy gıperdybystyq júıe jasadyq ári ony damytýdy jalǵastyryp jatyrmyz. AQSh Reseıge únemi qysym kórsetti. Óıtkeni, Qurama Shtattarda Keńes odaǵymen kúres boıynsha mamandar tym kóp. Shartty túrde aıtsaq, shamadan tys óndiristik qýat jasalǵan. Budan arylý qajet. Bolashaqqa qaraıtyn, álemde ne bolyp jatqanyn túsinetin jańa kúsh bolýǵa tıis», — dedi RF basshysy.
Ekonomıka jaıynda
Suhbat barysynda Vladımır Pýtın rekordtyq kólemdegi sanktsııaǵa qaramastan Reseı álemdegi besinshi, al satyp alý qabiletiniń tepe-teńdigi boıynsha Eýropada birinshi ekonomıkaǵa aınalǵanyn basa aıtty.
«Bizge óte kóp sanktsııa salynyp otyr. Degenmen, qazirgi ýaqytta AQSh qoldanyp otyrǵan quraldar jumys istemeıdi», — dedi Vladımır Pýtın.
