Rune Eaters Dota 2 týrnırinde qola júlde úshin alǵashqy matchta jeńilip qaldy
ASTANA. KAZINFORM — Bolashaq oıyndary aıasynda ótip jatqan Dota 2 týrnırinde qazaqstandyq Rune Eaters komandasy qola júlde úshin serııanyń alǵashqy kartasynda Qytaıdyń Team Resilience komandasyna ese jiberdi.
Kezdesýdiń alǵashqy kartasy 34 mınýtqa sozyldy. Match barysynda qytaılyq komanda birtindep basymdyqqa ıe bolyp, serııadaǵy esepti óz paıdasyna ashty.
Komandalar oıyn aldyndaǵy keıipkerlerdi tańdaýda ártúrli taktıka ustandy. Team Resilience oıynnyń sońyna qaraı kúsheıetin keıipkerlerdi tańdasa, Rune Eaters matchtyń basynan bastap qarsylasyna qysym jasap, oıyndy erterek óz paıdasyna sheshýge tyrysty.
Qazaqstandyq top match boıy kúresti toqtatpaı, birneshe sátti shabýyl uıymdastyrýǵa tyrysty. Alaıda ýaqyt ótken saıyn qytaılyq komanda óz quramynyń áleýetin tıimdi paıdalanyp, basymdyqty ulǵaıtty. Nátıjesinde alǵashqy karta Team Resilience paıdasyna aıaqtaldy.
Degenmen Rune Eaters úshin týrnır áli aıaqtalǵan joq. Alda serııanyń kelesi kartasy ótedi. Eger qazaqstandyq komanda jeńiske jetse, sheshýshi kartada qola júlde úshin kúresti jalǵastyrýǵa múmkindik alady.
Aıta keteıik, buǵan deıin, Rune Eaters shırek fınalda baq synaıtynyn jazǵan edik.
