Rýmynııanyń ońtústik-batysynda 5,7 baldyq jer silkinisi boldy

ASTANA. QazAqparat – Rýmynııanyń ońtústik-batysyndaǵy Gorj ýezinde keshe Rıhter shkalasy boıynsha 5,7 baldyq jer silkinisi boldy. Bul týraly Jer fızıkasynyń damýyn zertteý ulttyq ınstıtýty NIEP málimdedi, dep habarlaıdy QazAqparat Sınhýa agenttigine silteme jasap.

Bul Rýmynııada 2018 jyldyń 28 qazanynan beri tirkelgen eń kúshti zilzala boldy, ol kezde jerasty dúmpýiniń magnıtýdasy 5,8 bolǵan edi.

Terbelis oshaǵy jaqynda ǵana 5,2 baldyq jer silkinisi bolǵan taýly aımaqta 40 shaqyrym tereńdikte jatyr.

Dúmpý jerasty oshaǵynan ońtústik-shyǵysqa qaraı 300 shaqyrym jerde ornalasqan el astanasy Býharestte anyq sezilgen. Qurbandar týraly ázirge aqparat joq, degenmen oshaq aımaǵyndaǵy aýdandarǵa aıtarlyqtaı shyǵyn ákeldi, bir avtokólik ǵımarattardyń tóbesinen qulaǵan qırandylardyń astynda qaldy.

Keıingi kúnderi Rýmynııada birqatar jer silkinisi tirkeldi – jaqynda altaýy bolsa, búgin beseý tirkeldi.

Rýmynııa Eýropadaǵy belsendi seısmıkalyq aımaqtyń birine jatady. Elde tereńdigi 70-200 shaqyrym bolatyn, magnıtýdasy 7,0-den 7,8-ge deıin jetetin birneshe zilzala tirkelgen. 1977 jyly naýryzda bolǵan 7,2 baldyq zilzala saldarynan myńnan asa adam qaza taýyp, myńdaǵan úıler qıraǵan.

Rýmynııa men Túrkııa túrli tektonıkalyq taqtada ornalasqanymen Túrkııa men Sırııada joıqyn zilzala bolǵan 6 aqpan tańda Rýmynııada da qatarynan 5 jer silkinisi tirkelgen. Eń kúshtisiniń magnıtýdasy Rıhter shkalasy boıynsha 4,6-ǵa jetti.

Foto: static.vkurse.kz