Rýmynııanyń isker toptaryn Qazaqstanǵa ınvestıtsııa salýǵa shaqyramyz - Q.Ábdirahmanov
ASTANA. QazAqparat - Búgin Rýmynııanyń Syrtqy ister mınıstri Teodor-Vıorel Meleshkanýmen kelissózder ótkizgennen keıin QR Syrtqy ister mınıstri Qaırat Ábdirahmanov BAQ ókilderine málimdeme jasady, dep habarlaıdy QazAqparat.
«Biz ekijaqty jáne kópjaqty yntymaqtastyqtyń keń kólemindegi máselelerdi talqylap, saýda-ekonomıka men ınvestıtsııa salalaryndaǵy ózara is-qımyldyń kókjıekterin belgiledik. Elderimizdiń qolda bar tranzıt-kóliktik áleýetin tıimdi qoldaný salasynda yntymaqtasýdyń tereń joldaryn qarastyrdyq. Búgingi tańda energetıka salasyndaǵy yntymaqtastyq saýda-ekonomıkalyq baılanystarymyzdyń basym tarapy bolyp sanalady. Alaıda osyǵan qaramastan saýda salalaryn keńeıtý jáne ony qolǵa alý, ártaraptandyrý bizdiń mindetimiz. Elimizdiń ekonomıkany jańǵyrtý jónindegi baǵdarlamasyna rýmyn bıznesiniń de qatysýyna qyzyǵýshylyq tanytyp otyrmyz. Biz Rýmynııanyń isker toptaryn Qazaqstanǵa kelip, ınvestıtsııa salýǵa shaqyramyz», - dedi Qaırat Ábdirahmanov.
Onyń aıtýynsha, taraptar ekinshi otyrysy aǵymdaǵy jyldyń qazan aıynda Býharest qalasynda ótetin Qazaqstan-Rýmynııa saýda-ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komıssııasynyń tıimdi jumysyna joǵary baǵa bergen. Sonymen qatar eki eldiń mınıstrleri mádenıet jáne bilim berý salasyndaǵy qatynastardy jandandyrý mańyzdylyǵyna toqtalyp, stýdentter sanyn kóbeıtý, akademııalyq bilim ókilderi men mádenıet qaıratkerleriniń ózara saparlaryn ótkizý jaıy qozǵaǵan. 
«Shyǵys Eýropa men Balqandaǵy mańyzdy seriktes retinde Qazaqstan Rýmynııamen aradaǵy baılanystardyń damýyna basym mán beretindigin atap ótkim keledi. Óz kezeginde Rýmynııanyń Eýropada Qazaqstannyń múddelerin alǵa jyljytýǵa daıyn bolýyna ózimniń rızashylyǵymdy bildirgim keledi. Elder arasyndaǵy sátti suhbattyń nyǵaıýy men damýynyń aıǵaǵy retinde álemdik sahnadaǵy ózara is-qımyldy atap ótemin. Eýropadaǵy qaýipsizdik jáne yntymaqtastyq uıymyndaǵy tóraǵalyǵymyz, Astana EKSPO kórmesiniń ótkizilýi men Qazaqstannyń BUU Qaýipsizdik keńesine múshe bolýy syndy Qazaqstannyń halyqaralyq bastamalaryna kórsetilgen Rýmynııanyń qoldaýy úshin alǵysymyzdy bildiremiz. Múmkindikti paıdalana otyryp búgin resmı ashylýy ótetin Rýmynııanyń EKSPO-daǵy ulttyq kúniniń ótkizilýine sáttilik tileımin»,- dedi QR Syrtqy ister mınıstri.
