Rýmynııanyń burynǵy premeri óz-ózin óltirmekke árekettengen
ASTANA. 21 maýsym. QazAqparat - Rýmynııanyń burynǵy Premer-Mınıstri Adrıan Nestase óz-ózine qol salmaq boldy. Ol sársenbi kúni 2 jyl bas bostandyǵynan aıyrylý jazasyna kesilgen bolatyn.
Bul týraly eldiń prokýrory málim etti, dep jazdy ITAR-TASS.
Úkimettiń burynǵy basshysy jetkizilgen aýrýhanadaǵy dárigerlerdiń aıtýynsha, polıtsııa qyzmetkeri ony alyp ketýge kelgen kezde ol óziniń ıeginiń astyna qarý tirep, atyp jibergen.
Oqys oqıǵa Nestaseniń 62-ge keler shaǵynda boldy. Ol 2000 jyldan bastap 2004 jylǵa deıin Rýmynııa úkimetiniń basshysy qyzmetin atqarǵan.
