Rýmynııadaǵy Klýj-Napoka shahary Qaraǵandynyń baýyrlas qalasy atandy
QARAǴANDY. QazAqparat - Rýmyndyq Transılvanııa aımaǵynyń ortalyǵy Klýj-Napoka shahary Qaraǵandynyń baýyrlas qalasy boldy. Ol týraly kelisimge qaraǵandylyq delegatsııanyń Rýmynııaǵa sapary barysynda qol qoıyldy, dep habarlaıdy oblys ákimdiginiń resmı saıty .
Qaraǵandy qalalyq máslıhatynyń tóraǵasy Qudaıbargen Beksultanov pen qala ákiminiń orynbasary Asylbek Moldabaev bastaǵan qaraǵandylyq delegatsııa 23-25 qarashada Klýj-Napoka qalasynda bolyp qaıtty. Delegatsııa músheleri jergilikti mýnıtsıpaldyq jáne aımaqtyq bılik ókilderimen kezdesti. Klýj-Napoka qalasynyń meri Emıl Bokpen júzdesý barysynda eki qala basshysy ózara tıimdi qarym-qatynasty damytýǵa qyzyǵýshylyq tanytatynyn jetkizdi. Eki jaq saýda-ekonomıkalyq jáne mádenı-gýmanıtarlyq saladaǵy ózara qarym-qatynastyń áleýeti joǵary ekenin talqylady. Ásirese, Qaraǵandyda «Dachııa» rýmyndyq mádenı qoǵamynyń jáne Qaraǵandy ýnıversıtetinde Ortalyq Azııadaǵy jalǵyz rýmyn tili jáne ádebıeti kafedrasynyń baryn eskergen jón.
Qaraǵandylyqtar sonymen qatar Transılvanııanyń bıznes qaýymdastyǵynyń ókilderimen kezdesip, eki aımaqta birlesken jobalardy júzege asyrý múmkindikterin talqylady. Delegatsııany aqparattyq tehnologııalar salasyndaǵy rýmyndyq kompanııalardyń jańa zerttemelerimen tanystyrdy.
Kezdesýler nátıjesinde qazaqstan-rýmyn seriktestigi tarıhynda alǵash ret Qaraǵandy men Klýj-Napoka qalalary arasynda baýyrlastyq týraly kelisimge qol qoıyldy.
Sonymen qatar sapar aıasynda Qaraǵandy delegatsııasy Qazaqstannyń Qurmetti konsýldyǵynyń ashylý saltanatyna jáne birinshi Qazaq kınosy festıvaline qatysty.
