Rýmynııadaǵy qazaqstandyq munaı óńdeý zaýytynda órt bolyp, bir adam qaza tapty
2 shilde, juma kúni Rýmynııanyń Konstantsa qalasynyń mańyndaǵy «Petromidia» munaı óńdeý zaýytynda dızel otynyn óńdeý qondyrǵysynda ottyń tutanýyna ákelip soqqan oqıǵa boldy.
KMG International kompanııasynyń korporatıvtik damý jónindegi bas dırektory Eskendir Ábdibaıytovtyń habarlaýynsha, aldyn ala aqparatqa sáıkes bes adam zardap shekken, bir adam qaıtys boldy.
Daǵdarysty basqarýdyń ishki rásimderine sáıkes kompanııa barlyq resýrstardy jumyldyrdy, zaýyttaǵy tehnologııalyq protsester toqtatyldy, barlyq qyzmetkerler evakýatsııalandy.
«Qazirgi ýaqytta MÓZ-degi órt sóndirildi. Oqıǵa ornynda zaýyt pen jergilikti bıliktiń órtke qarsy qyzmetteri jumys isteýde. Jaǵdaı baqylaýda», – dep habarlady E. Ábdibaıytov.
Eske sala keteıik, Qara teńiz jaǵalaýynda ornalasqan «Petromidia» - KMG International kompanııasynyń Rýmynııadaǵy munaı óńdeý zaýyty.
