Rýmynııada Altyn Ordanyń 750 jyldyǵyn atap ótedi – SІM

NUR-SULTAN. QazAqparat – Rýmynııada 50 myńnan astam tatar dıasporasy turady. Bul týraly Qazaqstan Respýblıkasynyń Rýmynııadaǵy Elshisi Nurbah Rústemov aıtty, dep habarlaıdy QazAqparat tilshisi.

«Rýmynııaǵa barǵan kezde men úshin tyń jańalyq ashyldy: resmı aqparat boıynsha ol jaqta 50 myńnan astam tatar dıasporasy turady eken, al beıresmı aqparat boıynsha olardyń sany odan da kóp. Olar ata-babalary Rýmynııaǵa 1230 jyldary, Batý hannyń tusynda barǵandaryn aıtady. Ózderiniń ataýlary eski birneshe aýyldary bar», - deıdi Nurbah Rústemov SІM-de ótken brıfıngte.

Onyń aıtýynsha, tatar dıasporasynyń tili men qazaq tilinde aıtarlyqtaı aıyrmashylyq joq.

«Olar «Qaldaryńyz qalaı?» degen suraqqa «arý» dep jaýap beredi, ıaǵnı «arý» degen sóz «jaqsy» degen maǵyna beredi eken. Túrik telearnalaryn kóretindikten, tilderi túrik tiline beıimdelip ketken. Olardyń biri ózin «noǵaımyz» dese, endi biri «jońǵar tatarymyz», endi biri «túrik tatarymyz» deıdi. Aýyldary da osyǵan baılanysty shoǵyrlanǵan», - deıdi ol.

Sondaı-aq, elshi Qazaqstan men Rýmynııa arasyndaǵy dıplomatııalyq qarym-qatynas 27 jyl buryn ornaǵany týraly aıtty.

«Dıplomatııalyq qatynas negizinde eki el arasynda saıası, ekonomıkalyq jáne mádenı-gýmanıtarlyq salanyń irgetasy qalandy. Kelesi jyly memlekettiń bilim akademııasymen kelisip, sol jaqta Altyn Ordanyń 750 jyldyǵyn atap ótemiz», - deıdi Nurbah Rústemov.