Rýmynııa parlamentinde Elbasy Joldaýy talqylandy
Elshi atalmysh Joldaýda aıtylǵan Qazaqstannyń aldaǵy áleýmettik-ekonomıkalyq damýynyń aýqymdy baǵdarlamasymen tanystyryp, qańtar aıyndaǵy «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýdyń júzege asyrylý barysyn baıandady.
Kezdesýge qatysýshylar Elbasynyń Joldaýynda kórsetilgen maqsattar men basymdyqtarǵa joǵary baǵa berdi.
Parlamenttiń Depýtattar palatasynyń tóraǵa orynbasary, «Rýmynııa-Qazaqstan» parlamentaralyq dostyq tobynyń teń tóraǵasy Florın Iordake Joldaý birizdi jáne uzaqmerzimdi damýdy kózdeıtinin atap ótti. Sondaı-aq Qazaqstan álemniń 30 damyǵan eliniń qataryna enýdi kózdeıtin aýqymdy jáne naqty qadamdardyń vektoryn belgileıtinin málemdedi.
Rýmynııa Parlamentiniń Adam quqyqtary, dinder jáne azshylyq ulttar jónindegi komıteti tóraǵasynyń orynbasary Tamara Chofý medıtsına, tıisti tehnologııalar men ınfraqurylym (onkologııany qosqanda), sondaı-aq ǵylym men bilimdi damytý boıynsha Prezıdenttiń bastamalaryn aıryqsha atap ketti.
Jerorta teńizi Parlamenttik assambleıasynyń Elshisi Florın Ýrkan, ınvestıtsııalardy tartý, eksportty ulǵaıtý jáne jumys oryndaryn qurý boıynsha sharalarǵa erekshe nazar aýdaratyn Joldaý zamanaýı, básekege qabiletti Qazaqstandy qurýǵa negiz bolatynyn erekshe atap ótti. Ol sondaı-aq Eýropa elderimen strategııalyq seriktes qarym-qatynastardyń damýyn kózdeıtin Qazaqstannyń syndarly syrtqy saıasatyn joǵary baǵalady.
«Energobıt» energetıkalyq kompanııanyń basqarma tóraǵasy, Qazaqstannyń Klýj-Napoka qalasyndaǵy Qurmetti konsýly Shtefan Gadola, barlyq tapsyrmalar 30 damyǵan eldiń qataryna kirý boıynsha strategııalyq maqsatqa jetýge baǵyttalǵany Joldaýdyń túıindi ereksheligi ekenine nazar aýdartty. Oǵan qosa, eldiń azamattaryna jáne olardyń ál-aýqatyna baǵdarlaný, ınfraqurylym jáne ınnovatsııa, memlekettik basqarý men ádilet salalarynyń damýy Qazaqstan úshin bolashaqtyń syn-tegeýrinderine tótep berý joldaryn ýaqtyly jáne tıimdi sheshýine múmkindik beretinin aıtty.
«Bradý, Nıagý jáne seriktester» zań kompanııasynyń Basqarýshy seriktesi Roman Bradý bilimge, ǵylymǵa jáne densaýlyq saqtaýǵa shyǵystar bóligin JІÓ-den 10% deıin ósirýge ekpin qoıý durys ekenin basa aıtyp, bul Qazaqstannyń ǵalamdyq básekege qabilettiligin qamtamasyz etetin ekonomıkalyq ósýdiń jańa modelin qalyptastyrýǵa múmkindik beretinine kóńil aýdardy.
«Qazaqstan dostary klýbynyń» múshelerimen kezdesý barysynda Qazaqstan men Rýmynııa arasyndaǵy ekijaqty yntymaqtastyqtyń ózekti máseleleri qozǵalyp, Prezıdenttiń Joldaýynda aıtylǵan tapsyrmalar tóńireginde parlamentaralyq ózara árekettestikti damytýdyń aldaǵy perspektıvalary talqylandy.
