Rýmynııa Qazaqstanda temirjol tehnıkasy bólshekteriniń óndirisin qolǵa alady
NUR-SULTAN. QazAqparat – Rýmynııa Qazaqstanda temirjol tehnıkasy bólshekteriniń óndirisin qolǵa alady. Bul týraly Qazaqstan Respýblıkasynyń Rýmynııadaǵy Elshisi Nurbah Rústemov QR Syrtqy ister mınıstrliginde ótken brıfıngte aıtty, dep habarlaıdy QazAqparat tilshisi.
Elshiniń aıtýynsha, bıyl 26 qarashada Rýmynııanyń jańadan saılanǵan Prezıdenti Klaýs Iohannıske senim gramotalaryn tapsyrý rásimi ótken bolatyn. Onyń barysynda Prezıdent Qazaqstanmen eki jaqty baılanystardy tereńdetý jóninde naqty qadamdar jasaý qajettigin atap ótti.
«Maǵan Qazaqstan Respýblıkasynyń Prezıdenti Qasym-Jomart Toqaev myrza Qazaqstan men Rýmynııa arasyndaǵy yntymaqtastyqty damytý, saıası dıalogty jandandyrý, ekonomıkalyq jáne mádenı–gýmanıtarlyq baılanystardy keńeıtýge yqpal etý jónindegi qurmetti ári jaýapty mıssııa júktegen bolatyn», - deıdi Nurbah Rústemov SІM-de ótken brıfıngte.
Onyń sózine qaraǵanda, Qazaqstan men Rýmynııa arasynda taýar aınalymy joǵary deńgeıde bolyp otyr.
«Rýmynııa – Qazaqstannyń Ońtústik-Shyǵys Eýropadaǵy negizgi saýda seriktesi. Saýda aınalymy 2019 jyldyń 9 aıynda 1,337 mlrd AQSh dollary boldy. Saýda aınalymynyń negizgi quraýshy – Qazaqstannan Rýmynııaǵa shıki munaı eksporty. Sonymen birge, taýar aınalymy qurylymyn aıtarlyqtaı ártaraptandyrý boıynsha belsendi jumystar bastaýdy josparlap otyrmyz», - deıdi ol.
Sonymen qatar, elshi Býharest qalasynyń Saýda-ónerkásip palatasymen kelissózder jasalǵanyn da aıtty.
«Sonyń nátıjesinde Qazaqstan aýmaǵynda mashına jasaý jáne temir jol salasy úshin qosalqy bólshekter óndirisi salasynda birlesken kásiporyndar qurý týraly kelisimge qol jetkizildi», - deıdi Nurbah Rústemov.
Eske sala ketsek, buǵan deıin Rýmynııada Altyn Ordanyń 750 jyldyǵy atap ótiletini týraly jazǵan bolatynbyz.
Sondaı-aq, rýmynııalyq fan-klýb músheleri tanymal ánshi Dımash Qudaıbergendi eline shaqyryp otyr.
