Rýmynııa Qaraǵandy oblysymen áriptestik ornatýǵa qyzyǵýshylyq tanytýda
ASTANA. QazAqparat - Qaraǵandyǵa Rýmynııa delegatsııasy keldi. Qonaqtar oblys ákim Erlan Qoshanovpen kezdesip, óńir men Rýmynııa arasyndaǵy áriptestikti damytýdy talqylady.
Syrtqy ister mınıstri Teador Meleshkaný bastaǵan delegatsııa quramynda Rýmynııanyń Qazaqstandaǵy Tótenshe jáne Ókiletti elshisi Chezar-Manole Armıaný jáne birneshe rýmyndyq mınıstrlikter jetekshileriniń orynbasarlary bar, dep habarlaıdy Qaraǵandy oblysy ákiminiń resmı saıty.
- Bizdiń Memleket basshysynyń arqasynda Qazaqstan aýmaǵynda júzden astam ult kelisim men birlikte ómir súrip jatyr, - dedi kezdesýde oblys ákimi Erlan Qoshanov. - Elimizde biregeı etnosaralyq ınstıtýt - Qazaqstan halqy Assambleıasy qurylǵan. Bizdiń oblys tóńireginde 80-ge jýyq etno-mádenı ortalyq jumys isteıdi. Rýmyndyqtardyń «Dakııa» mádenı -qoǵamdyq birlestigi 2005 jyly quryldy. Qaraǵandy memlekettik ýnıversıtetinde rýmyn tili jáne ádebıeti kafedrasy ashyldy.
Aımaq basshysy meımandarǵa Qaraǵandy oblysy týraly aıtyp berdi. Sonymen qatar bilim, bıznes, ónerkásip salalarynda áriptestik ornatýdy
usyndy.
Syrtqy ister mınıstri Teodor Meleshkaný óz kezeginde rýmyndyq bılik bizdiń óńirmen qoıan-qoltyq baılanysty damytýǵa qyzyǵýshylyq tanytyp otyrǵanyn jetkizdi.
- Bizde jan-jaqty áriptestikti damytýǵa qyzyǵýshylyq bar, - dedi Rýmynııa SІM. - Birinshi kezekte energetıka salasynda. Biraq biz sondaı-aq, aýyl sharýashylyǵy, jeńil ónerkásip, medıtsına, aqparattyq tehnologııalar, ǵylym men zertteýler salasynda áriptestikti keńeıtýdi qalaımyz. Bizdiń Qazaqstanǵa issaparymyzdan keıin qazan aıynda Rýmynııada partııaaralyq komıssııanyń otyrysy ótedi. Bul qazaqstandyq-rýmyndyq áriptestik jobalardy usynýǵa jaqsy múmkindik beredi.
Al, rýmyn delegatsııasynyń issapary aıasynda Rýmynııa saýda-ónerkásip palatasy men «Atameken» palatasy arasynda eki jaqty kelisim jasalady. Sonymen qatar, Býharest polıtehnıkalyq ýnıversıteti men Qaraǵandy polıtehnıkalyq ýnıversıteti arasynda áriptestik týraly kelisimge qol qoıylady.
Kezdesý sońynda Erlan Qoshanov basqarma basshylaryna rýmyn bılik ókilderine osy jyldyń kúz aıynda Býharestte ótetin partııaaralyq otyrysta qaralatyn áriptestik ornatýǵa qatysty múmkindikterdi qarastyrýdy tapsyrdy.
Qaraǵandyǵa issapar kezinde rýmyn delegatsııasynyń ókilderi Spassktegi memorıaldyq keshenge de bardy. Onda olar saıası qýǵyn-súrgin qurbany bolǵan otandastarynyń rýhyna taǵzym etti. Sonymen qatar «Dakııa» rýmyn etno-mádenı birlestiginiń ókilderimen kezdesti.
