Rýmynııa fýtbol federatsııasynyń prezıdenti: «Qazaqstan da, Rýmynııa da qıyn topta júrip tájirıbe jınaıdy»
ASTANA. QazAqparat - 2018 jylǵy Álem chempıonaty irikteý týrnırinde Qazaqstan quramasy Rýmynııa, Polsha, Danııa, Chernogorııa jáne Armenııa quramalarymen bir topqa túsken bolatyn. Osyǵan baılanysty Rýmynııa fýtbol federatsııasynyń prezıdenti Razvan Býrlıaný jerebeniń qorytyndysy boıynsha Qazaqstan fýtbol federatsııasynyń baspasóz qyzmetine pikirin bildirdi.
«Biz úshin Reseıde ótetin Álem chempıonatynyń irikteý týrnıri mańyzdy. Óıtkeni, Álem chempıonatynyń fınaldyq kezeńine qatyspaǵanymyzǵa 2018 jyly týra 20 jyl tolady, - deıdi Rýmynııa fýtbol federatsııasynyń basshysy.
Onyń aıtýynsha, sol sebepti Rýmynııa úshin Álem chempıonatyna qatysý úlken jetistik, ulttyq maqtanysh bolmaq.
«Ár matchta quramamyz tájirıbe jınaıdy. 2016 jylǵy Eýropa chempıonatynyń irikteý týrnırinde Polsha fýtbolshylary Germanııa quramasymen birinshi orynda keledi. Danııa men Portýgalııa arasyn týrnır kestesinde nebári eki upaı bólip tur. Meniń pikirim boıynsha, Portýgalııa eýropalyq fýtboldyń eń myqty kúshi sanalady. Chernogorııa, Armenııa jáne Qazaqstan quramalary da jaqsy oınap júr. Sizdiń eldiń quramasymen bir topqa túskenimizge qýanyshtymyz. Óıtkeni, eki el arasynda ózara qarym-qatynas jaqsy qalyptasqan. Qarym-qatynasty fýtbol arqyly da nyǵaıta túsýge bolady», dedi ol.
«Rýmynııa quramasynyń sońǵy jyldardaǵy jetistigin qalaı túsindire alasyz?» degen suraqqa federatsııa prezıdenti bylaı dep jaýap beredi: «Bul ońaı jumys bolǵan joq. Tórt aı buryn damý jolynyń strategııalyq josparyn ázirleý qajet dep sheshtik. Bizdiń elde alǵash ret fýtbol federatsııasy 2015-2020 jyldarǵa arnalǵan damý stragegııasyn qurdy. Óıtkeni, Rýmynııanyń 2020 jyly Eýropa chempıonatynyń birneshe matchyn qabyldaý múmkindigi bolady. Qazirgi ýaqytta bizdiń quramanyń bas bapkeri men tehnıkalyq qyzmetkerleri úzdik sanalady. Sonymen qatar, ulttyq quramanyń namysyn qorǵaıtyn jaqsy fýtbolshylardyń ýaqyty keldi. Osynyń arqasynda FIFA reıtınginde 42-shi orynnan 8-shi orynǵa kóterildik. Ári qaraı da damı túsemiz dep úmittenemiz».
Eske sala keteıik, 2018 jylǵy Álem chempıonaty irikteý týrnırinde Qazaqstan quramasy Rýmynııa, Polsha, Danııa, Chernogorııa jáne Armenııa quramalarymen bir topqa tústi.
