Rýmynııa bıligi kitap jazǵan qylmyskerlerdiń jaza merzimin qysqartady
ASTANA. QazAqparat - Abaqtyda otyrǵan rýmynııalyq qylmyskerler jappaı ǵylymı eńbekter jazyp júr. Ár jazǵan kitaby úshin olardyń jaza merzimin 30 kúnge qysqartady, dep jazady 24.kz.
Byltyr rýmynııalyq tutqyndar 340-tan asa ǵylymı eńbek jarııalaǵan. Bul 2014 jylmen salystyrǵanda 4 esege artyq. Qylmyskerlerdiń osyndaı ǵylymǵa qumarlyq tanytqany prokýrorlardy da qyzyqtyrǵan. Sońǵy birneshe aıda elde paraqorlyqpen kúres kúsheıip, kóptegen joǵary laýazymdy saıasatkerler men kásipkerler túrmege toǵytylǵan bolatyn. Áıtse de olardyń aqsha tólep, óz atynan ózgege kitap jazdyrýǵa da múmkindikteri bar. Endi prokýrorlar tutqynda otyrǵandardyń shyǵarmalaryn, ǵylymı jetekshilik etken ýnıversıtet ustazdaryn tekserýge kiristi.
