Rýmynııanyń jańa úkimetiniń baǵdarlamasy men quramy jarııalandy
ASTANA. KAZINFORM – Rýmynııanyń premer-mınıstri laýazymyna usynylǵan eýroparlament depýtaty Eýdjen Tomak bastaǵan komanda jańa úkimettiń baǵdarlamasy men quramyn ázirleý jumysyn aıaqtady. Ol bul qujattardy parlamenttiń bekitýine usynýdy kózdep otyr, dep habarlaıdy TASS.
Úkimet baǵdarlamasynda bıýdjet tapshylyǵyn qysqartý, Eýropalyq odaq-pen kelisilgen reformalardy jalǵastyrý, jeke sektordy qoldaý jáne bıýrokratııalyq kedergilerdi azaıtý sharalary qarastyrylǵan. Alaıda jańa kabınettiń basty basymdyǵy ákimshilik-aýmaqtyq reforma bolady. Taǵaıyndalǵan premerdiń aıtýynsha, bul reformasyz baǵdarlamanyń ózge tarmaqtaryn iske asyrý múmkin emes.
Tomaktyń kabınetinde úsh vıtse-premer jáne 15 mınıstr bolady. Syrtqy ister mınıstri qyzmetine qazirgi Syrtqy ister mınıstriniń orynbasary, Rýmynııanyń Ekonomıkalyq yntymaqtastyq jáne damý uıymy-na qosylý úderisiniń ulttyq úılestirýshisi Lýka Nıkýleský usynyldy.
Qorǵanys mınıstri qyzmetine Rýmynııanyń NATO janyndaǵy turaqty ókili Dan Nekýleeský, al ádilet mınıstri laýazymyna prezıdenttiń konstıtýtsııalyq máseleler jónindegi keńesshisi Kosmın Soare-Fılatov usynyldy.
Buǵan deıin Tomak «saıası emes, tehnıkalyq úkimet» qurýdy kózdeıtinin málimdep, osy maqsatta saıası partııalarmen konsýltatsııalar bastaǵan bolatyn. Alaıda kelissózder naqty nátıje bermedi.
Premerge úkimet baǵdarlamasy men quramyn daıyndaýǵa berilgen 10 kúndik merzim jeksenbi kúni aıaqtalady. Osy kúni tıisti qujattar parlamentke tapsyrylýy tıis. Daýys berý kelesi aptanyń basynda ótedi dep kútilýde.
Burynǵy bıleýshi koalıtsııanyń eki partııasy — Ulttyq-lıberaldyq partııa men Rýmynııany qutqarý odaǵy parlamenttegi daýys berý kezinde Tomak kabınetin qoldamaıtyndaryn málimdedi.
Al Sotsıal-demokratııalyq partııa men Rýmynııadaǵy vengrlerdiń demokratııalyq odaǵy ázirge óz ustanymdaryn anyqtaǵan joq.
Soǵan qaramastan, Tomak jeke kelissózder barysynda 200-den astam parlament múshesiniń qoldaýyna ıe bolǵanyn habarlady. Úkimetti bekitý úshin keminde 233 depýtattyń daýysy qajet.
Buǵan deıin Rýmynııa parlamenti kópshilik daýyspen úkimetke senimsizdik votýmyn qoldap, sonyń nátıjesinde mınıstrler kabıneti otstavkaǵa jiberilgen bolatyn.
Aıta ketelik Rýmynııada saıası daǵdarys: prezıdent ulttyq kúshterdiń yqpalyn shektegen edi.
