Rýmynııanyń qorǵanys mınıstri jalǵan dıplomy úshin otstavkaǵa ketti

ASTANA. KAZINFORM — Rýmynııanyń qorǵanys mınıstri Ionýts Moshtıaný óz bilimi týraly jalǵan málimetterge qatysty shyqqan daýdan keıin otstavkaǵa ketti. Bul týraly rýmyndyq Digi24 arnasy habarlady, dep jazdy Belta.

— Búgin men mınıstrliktegi qyzmetimnen ketý týraly ótinish jazdym. Men bilimime qatysty ári kóp jyldar buryn jasaǵan qateligime baılanysty talqylaýlar qazirgi ýaqytta eldi basqaryp otyrǵandardy alańdatqanyn qalamaımyn, — dedi ol.

Rýmyndyq BAQ-tyń málimetine sáıkes, Moshtıaný óz qyzmetine alǵash ret ornalasqanda, ıaǵnı, kólik mınıstriniń keńesshisi bolyp jumys istep júrgen kezde, resmı túıindemesinde Býharestegi Athenaeum ýnıversıtetin bitirgenin kórsetken. Alaıda ýnıversıtet ókilderi onyń eshqashan stýdenti bolmaǵanyn málimdedi.

Jalǵan málimetterdiń áshkerelenýinen keıin Moshtıaný túıindemesinde Athenaeum ýnıversıtetiniń dıplomy týraly aqparattyń qate ekenin moıyndady. Mınıstr bul qatelikti «ınternetten alynǵan úlgi boıynsha asyǵys toltyrylǵan túıindeme» dep túsindirdi.

Keıinirek mınıstr basqa dıplomnyń sýretin jarııalap, ol — Bioterra ýnıversıtetiniń dıplomy. Rýmyndyq BAQ bul dıplom men Moshtıanýdyń túıindemesinde de «mańyzdy sáıkespeýshilik» bar ekenin atap ótti.

Resmı bıografııalyq málimetterge sáıkes, Moshtıaný 1995 jyly Bioterra ýnıversıtetine túsken. Biraq onyń agrotýrızm salasy boıynsha alǵan dıplomy 2018 jylǵa tıesili. Ózinyń aıtýynsha, ol oqýyn tastap, jumysqa kirisip, keıinnen bilim alýyn jalǵastyrǵan. 2015 jyly jeltoqsanda Moshtıaný Rýmynııanyń kólik mınıstriniń keńesshisi jáne memlekettik TAROM áýe kompanııasynyń basqarma múshesi qyzmetterin atqarýǵa taǵaıyndaldy. Zań boıynsha, bul eki laýazymdy atqarý úshin Moshtıaný joǵary bilim týraly dıplom usynýǵa mindetti bolǵan.

Aıta keteıik, Rýmynııa eldegi NATO áskeriniń sanyn kóbeıtetinin habarlady.