Rýmynııanyń burynǵy prezıdenti Ion Ilıeský 95 jasynda qaıtys boldy

ASTANA. KAZINFORM — Rýmynııanyń burynǵy prezıdenti Ion Ilıeský seısenbi kúni 95 jasynda ómirden ozdy. Bul týraly Rýmynııa úkimeti habarlady, dep jazady Sınhýa.

Densaýlyq saqtaý organdarynyń málimetinshe, 2025 jyldyń maýsym aıynyń basynan beri Ion Ilıeský Býharesttegi aýrýhanalardyń birinde emdelip jatqan. Keıin oǵan ókpe obyry (ókpeniń qaterli isigi) dıagnozy qoıylǵan. Sońǵy kúnderi onyń jaǵdaıy kúrt nasharlaǵan.

Ilıeský Rýmynııa prezıdenti qyzmetin 1990–1996 jáne 2000–2004 jyldar aralyǵynda atqarǵan.

Rýmynııa úkimeti Ion Ilıeskýdiń qaıtys bolýyna baılanysty tereń qaıǵyryp, onyń otbasyna jáne jaqyndaryna kóńil aıtty.

Budan buryn Nıgerııanyń burynǵy prezıdenti Muhammadý Býharı 83 jasynda Londondaǵy aýrýhanada kóz jumǵany málim boldy.