Rýmynııada saıası daǵdarys: úkimet basshysyz qaldy
ASTANA. KAZINFORM — Rýmynııa premer-mınıstrligine kandıdat Zıgfrıd Mýreshan parlamenttiń qos palatasynyń senimine ıe bola almady. Mýreshan kabınetine 182 depýtat pen senator daýys berip, 15-i qarsy boldy, al úkimet basshysy bolý úshin kemi 233 daýys jınaý qajet, dep habarlaıdy Kazinform agenttiginiń menshikti tilshisi.
Daýys berý 30 qyrkúıekte Depýtattar palatasy men Senattyń birlesken otyrysynda ótti. Otyrysqa 464-465 zań shyǵarýshynyń 321-i qatysty, sonyń 197-si daýys bergen.
Premer-mınıstrlikke kandıdat, Eýropa Parlamentiniń PNL partııasynan saılanǵan 45 jastaǵy depýtaty Z.Mýreshandy 17 qyrkúıekte prezıdent Nıkýshor Dan usynǵan. Bul 5 mamyrda Ilıe Bolojan kabıneti qulaǵannan bergi úshinshi kandıdat, parlament resmı túrde qaıtarǵan ekinshi kandıdat: maýsym aıynda Adrıan Veshtıa kabıneti 189 daýys jınaǵan bolatyn.
Mamyr aıynan beri Rýmynııany «qysqarǵan» ókilettikter berilgen ýaqytsha úkimet basqaryp keledi.
Daýys berýden keıin Z.Mýreshan daǵdarysqa sebepshi bolǵan partııalar ony odan ári uzartýǵa sheshim qabyldaǵanyn aıtyp, endi sheshim prezıdenttiń quzyrynda ekenin málimdedi. Ol jańa premer-mınıstrdi taǵaıyndaý nemese parlamentti taratý týraly sheshim qabyldaýy múmkin.
Rýmynııa Konstıtýtsııasynyń 89-babyna sáıkes, eger alǵashqy ótinishten keıin 60 kún ishinde úkimet senim votýmyn ala almasa jáne eki kandıdat keri qaıtarylsa, prezıdent parlamentti taratýǵa quqyly.
Úkimet bolmaǵandyqtan eldegi qarjylyq daǵdarys tereńdep barady. Rýmynııa EO-da proportsıonaldy túrde eń úlken bıýdjet tapshylyǵyna tap bolǵan. Al eldiń ınvestıtsııalyq reıtıngin saqtaý úshin 2027 jylǵy bıýdjet tapshylyǵyn azaıtý qajet.
Sarapshylar jańa úkimet jasaqtalýynyń keshigýi nemese Sotsıal-demokratııalyq partııa (PSD) men «Rýmyndardyń birligi úshin alıans» (AUR) arasyndaǵy koalıtsııa qarjylyq konsolıdatsııany buzýy múmkin dep eskertedi. Taǵy bir aıta keterligi, eki partııanyń parlamenttegi barlyq mandatyn qosqanda da 233-ke jetpeıdi.
Osyǵan baılanysty Rýmynııa prezıdenti premer-mınıstr laýazymyna jańa kandıdatty usynýǵa májbúr. Úmitkerge qos palatanyń da qoldaýyna ıe bolýǵa on kún beriledi. Al kandıdat anyqtalmasa, onda el prezıdenti kezekten tys saılaý belgileýi tıis.
Dýnaıdyń tartylýy saldarynan Rýmynııa jalǵyz AES-in toqtatty.
Rýmynııada COVID-19 pandemııasy kezinde qaıtys bolǵandar jerlengen oryn tabyldy.
