Rýmynııada saıası daǵdarys: prezıdent ulttyq kúshterdiń yqpalyn shektedi

ASTANA. KAZINFORM – Rýmynııa prezıdenti Nıkýshor Dan elde ulttyq baǵyttaǵy saıası kúshterdiń bılikke kelý yqtımaldyǵy óte tómen ekenin málimdedi, dep habarlaıdy TASS.

Ol bul pikirin Horvatııanyń Dýbrovnık qalasynda ótken «Úsh teńiz bastamasy» sammıti aıasynda jýrnalısterge bergen suhbatynda aıtty.

– Eger maǵan premer-mınıstrdi taǵaıyndaý qajet bolsa, mundaı stsenarııge jol bermeý úshin barlyq sharany qabyldaımyn, – dedi Nıkýshor Dan.

Buǵan deıin Rýmynııanyń Sotsıal-demokratııalyq partııasy men Rýmyndardy biriktirý alıansy parlamentke premer-mınıstr Ilıe Bolojan úkimetine senimsizdik votýmyn engizgen. Daýys berý 5 mamyrǵa josparlanǵan.

Sarapshylar bul daýys berý úkimettiń otstavkasyna ákelýi múmkin ekenin joqqa shyǵarmaıdy. Sonymen qatar jańa koalıtsııa qurý yqtımaldyǵy da talqylanýda. Alaıda Sotsıal-demokratııalyq partııa jetekshisi Sorın Grındıaný ulttyq kúshtermen birlesip úkimet qurý jospary joq ekenin málimdegen.

Saıası daǵdarys 20 sáýirde sotsıal-demokrattar premer-mınıstrdi qoldaýdan bas tartyp, úkimet quramynan óz mınıstrlerin keri shaqyryp alǵannan keıin bastalǵan.

Aıta keteıik, buǵan deıin Rýmynııanyń qorǵanys mınıstri jalǵan dıplomy úshin otstavkaǵa ketkeni habarlandy.