Rýmynııada prezıdenttikke eks-kandıdatqa memlekettik tóńkeris jasamaq boldy degen kúdik keltirilip otyr

ASTANA. KAZINFORM – Rýmynııa prokýratýrasy ótken jyly ótpeı qalǵan prezıdenttik saılaýda kandıdat bolǵan ýltraultshyl saıasatker Kelın Djordjeskýge tóńkeris jasaýǵa árekettendi degen aıyp taqty, dep habarlaıdy Euronews.

Taǵylyp otyrǵan aıypqa sáıkes, Djordjeský men taǵy 21 adam ulttyq qaýipsizdik pen eldiń konstıtýtsııalyq qurylymyna qaýip tóndirýdi josparlaǵan.

Djordjeský kináli dep tanylsa, ol 20 jylǵa bas bostandyǵynan aıyrylady.

Kúdiktilerdiń biri – Horatsıý Potra. Prokýrorlardyń málimetinshe, ol 7 jeltoqsanda Djordjeskýmen kezdeskennen keıin áskerı top qurǵan.

Oǵan deıin Rýmynııanyń Konstıtýtsııalyq soty prezıdent saılaýynyń alǵashqy týrynyń nátıjelerin joıǵan bolatyn.

Prokýratýranyń málimdemesinde Potra qurǵan qarýly top eldi arandatyp, qaqtyǵys uıymdastyrýǵa talpynǵan.

Rýmyn BAQ-tarynyń habarlaýynsha, Potra byltyr 8 jeltoqsanda qarýly adamdar tobymen birge Býharestke bara jatqan jolda ustalǵan. Keıin ol polıtsııaǵa ózi keledi degen shartpen bosatylǵan, alaıda elden qashyp ketken.

Rýmynııanyń bas prokýrory Aleks Florentsanyń seısenbi kúni ótken baspasóz máslıhatynda Potranyń qaıda júrgeni belgisiz ekenin, sondaı-aq onyń Reseıden baspana suraýǵa talpynǵanyn jektizdi. Sondaı-aq Florentsa eks-kandıdattyń Facebook pen TikTok sekildi platformalardaǵy jalǵan, arandatýshy aqparat taratýshy kompanııalardy paıdalanǵanyn jetkizdi.

Djordjeský bıyl mamyrda qaıta ótken saılaýǵa qatysý quqyǵynan aıyrylǵan. Qaıta saılaýda proeýropalyq kandıdat Nıkýshor Dan ýltraońshyl Djordj Sımıonnan basym túsip jeńiske jetti. Osydan keıin Djordjeský saıasattan ketetinin málimdedi.