Rýmynııa prezıdenti Klaýs Iohannıs otstavkaǵa ketetinin jarııalady

ASTANA. KAZINFORM — Rýmynııa prezıdenti Klaýs Iohannıs otstavkaǵa ketý týraly sheshimin jarııalady. Saıasatker qyzmetinen 12 aqpanda ketetinin naqtylady, dep habarlaıdy Euronews. 

Bul málimdeme oppozıtsııalyq partııalardyń memleket basshysyna ımpıchment jarııalaý boıynsha parlamentte daýys berýdi suraý nıeti aıasynda jasaldy.

— Rýmynııany osy daǵdarystan qutqarý úshin men Rýmynııa prezıdenti qyzmetinen ketemin, — dedi Iohannıs.

Klaýs Iohannıs 2014 jyldan beri eldi basqaryp keledi. Ótken jylǵy qarashada Rýmynııada prezıdenttik saılaýdyń birinshi kezeńi ótip, ony ásire ońshyl kandıdat Kelın Djordjeský jeńgen. 

Rýmynııanyń Konstıtýtsııalyq soty saılaý qorytyndysyn joıdy. 

Sodan keıin Rýmynııanyń Joǵarǵy soty ókilettik merzimi 21 jeltoqsanda aıaqtalǵan Iohannıstiń jańa prezıdent saılanǵansha qyzmetinde qalýy kerek dep sheshti. 
Konstıtýtsııaǵa sáıkes, memleket basshysy otstavkaǵa ketken jaǵdaıda jańa prezıdent saılaýy úsh aıdyń ishinde ótýi tıis.

Osyǵan deıin Rýmynııada prezıdent saılaýynyń ótkizilmeýine qarsy narazylyq aktsııasy ótkenin jazǵan edik.