Rýmynııa premeri Olımpıadanyń jabylý rásimine boıkot jarııalamaq

ASTANA. KAZINFORM – Rýmynııanyń Premer-mınıstri Marchel Cholaký Parıjde ótip jatqan Olımpıadanyń jabylý rásimine boıkot jarııalamaqshy. Onyń pikirinshe, rýmynııalyq gımnasttarǵa tóreshilik ádiletsiz bolǵan, dep habarlaıdy reseılik TASS agenttigi.

«Men gımnastıkadaǵy tartys týdyrǵan oqıǵaǵa baılanysty Parıj Olımpıadasynyń jabylý rásimine qatyspaımyn dep sheshtim. Rýmynııalyq gımnasttarǵa qatysty qabyldanǵan sheshim ádiletsiz», dep jazdy ol óziniń Facebook paraqshasynda.

«Adal termen kelgen medaldy ne bapkerler, ne jetekshi tehnıkalyq mamandar túsinbeıtin narazylyq negizinde bermeı qoıý aqylǵa syımaıdy».

Cholakýdyń pikirinshe, atalǵan básekeniń uıymdastyrý júıesinde bir kemshilik bar.

Ol rýmynııalyq gımnasttarǵa óz eliniń olardy olımpıada júldegerleri retinde qarastyratynyn jetkizdi.

Dúısenbi kúni rýmynııalyq gımnast qyz Ana Berbosý kilemdegi jattyǵýlar boıynsha qola júldeger dep jarııalanǵan kezde tóreshiler amerıkalyq básekelestiń qaıyrylýynan soń ózderiniń sheshimin ózgertti. Sonyń saldarynan rýmynııalyq sportshy 4-shi orynǵa syrǵydy. Al qolany amerıkalyq sportshy Djordan Chaılz aldy. Tóreshiler taǵy bir rýmynııalyq gımnast Sabrına Maneka-Voınıaǵa qatysty «kilem shetine shyǵyp ketti» dep sheshim shyǵardy. Alaıda sportshy oǵan narazylyq bildirgenimen sheshim ózgerissiz qaldy, rýmynııalyq sportshy 5-shi oryn aldy.