Rýmynııa parlamenti jańa úkimetti bekitti
ASTANA. KAZINFORM — Rýmynııanyń qos palataly parlamenti 20 qazanda táýelsiz dıplomat Lýka Nıkýleský bastaǵan úkimetti bekitip, elde jarty jylǵa sozylǵan saıası daǵdarysqa núkte qoıdy, dep habarlaıdy Kazinform agenttiginiń menshikti tilshisi.
Úkimetti bekitýdi 280 depýtat pen senator qoldady. Qabyldaý úshin keminde 233 daýys qajet bolǵan, al 58-i qarsy boldy. Daýys berý Depýtattar palatasy men Senattyń birlesken plenarlyq otyrysynda ótti.
Buǵan deıin jýrnalıst ári Syrtqy ister mınıstrliginiń memlekettik hatshysy bolǵan 55 jastaǵy Lýka Nıkýleský Rýmynııanyń EYDU-ǵa qosylý úderisin úılestirgen. Ony 5 qazanda prezıdent Nıkýshor Dan premer-mınıstrlikke usyndy.
Bul – ótken jyldyń mamyr aıynyń basynda Ilıe Bolojan úkimeti otstavkaǵa ketkennen keıingi premer-mınıstrlikke usynylǵan tórtinshi kandıdat. Buǵan deıin úkimet jasaqtaýdyń úsh áreketi de sátsiz aıaqtalǵan.
Jańa kabınette mınıstrlik laýazymdardyń shamamen úshten ekisin Sotsıal-demokratııalyq partııanyń (PSD) ókilderi, qalǵanyn táýelsiz mamandar ıelendi. Negizgi taǵaıyndaýlar arasynda: vıtse-premer jáne ishki ister mınıstri Marıan Nıaksý (PSD), qarjy mınıstri Aleksandrý Nazare (táýelsiz), syrtqy ister mınıstri Sebastıan-Denýt Nekýleeský (táýelsiz), qorǵanys mınıstri Shtefan-Radý Oprıa (PSD) bar.
Úkimetti bekitý kezinde Sotsıal-demokratııalyq partııa (PSD), Ulttyq-lıberaldyq partııa (PNL), Rýmynııadaǵy majarlardyń demokratııalyq odaǵy (UDMR) jáne ulttyq qaýymdastyyqtyń ókilderi qoldaý bildirdi. Alaıda Ulttyq-lıberaldyq partııa men Rýmynııadaǵy majarlardyń demokratııalyq odaǵy jańa úkimettiń quramyna enbedi. Al ońshyl baǵyttaǵy «Rýmyndardy biriktirý alıansy» (AUR) men Rýmynııany qutqarý odaǵy (USR) úkimetke qarsy daýys berdi.
Daýys berý qorytyndysynan keıin Lýka Nıkýleský Rýmynııanyń alty aıǵa sozylǵan saıası daǵdarystan shyqqanyn málimdep, úkimet jumysyna dereý kirisetinin aıtty. Jańa kabınettiń alǵashqy otyrysy sol kúni keshke ótip, Prezıdent Nıkýshor Dan úkimetti taǵaıyndaý týraly jarlyqqa qol qoıdy. Qujat resmı basylymda jarııalandy.
Jańa úkimettiń basty mindetteri – bıýdjetti qaıta qaraý jáne 2027 jyldyń bıýdjetin qabyldaý. Rýmynııa Eýropalyq odaqtaǵy bıýdjet tapshylyǵy eń joǵary elderdiń biri sanalady. Bıyl tapshylyq JІÓ-niń 6,2 paıyzyna jetedi dep josparlandy. El Eýroodaq aldyndaǵy mindettemesine sáıkes, bul kórsetkishti 2030 jylǵa qaraı 3 paıyzdan tómendetýge tıis. Al 2027 jyldyń bıýdjetin ýaqytynda qabyldaý eldiń ınvestıtsııalyq reıtıngin saqtaý úshin mańyzdy.
Eýropalyq komıssııa men halyqaralyq reıtıngtik agenttikter saıası daǵdarystyń aıaqtalýyn oń baǵalady. Eýropalyq komıssııa tóraǵasy Ýrsýla fon der Lıaıen jańa premer-mınıstrdi quttyqtady.
Congratulations to @LucaNiculescu on becoming Prime Minister of Romania. We have important work ahead of us. To create opportunities for people and for businesses. And to strengthen security on our Eastern Flank. We have no time to waste. Let’s move forward together, for Romania and for Europe.
— Ursula von der Leyen (@vonderleyen) October 20, 2026
Buǵan deıin Rýmynııada saıası daǵdarys bolyp, úkimet basshysyz qalǵanyn habarlaǵan bolatynbyz.
