Rýmynııa AES jumysyn saqtaý úshin Dýnaıdaǵy jartasty jardy
ASTANA. KAZINFORM — Rýmynııa áskerı kúshteri Dýnaı ózenindegi jartasty jaryp, Chernavode atom elektr stantsııasyna keletin sý aǵynyn kóbeıtýge tyrysty. Mundaı sheshim ózen sýynyń kúrt taıyzdanýynan keıin qabyldandy. Sý deńgeıiniń tómendeýi stantsııadaǵy energobloktardyń biriniń turaqty jumysyna qaýip tóndirgen, dep habarlaıdy Euronews.
Rýmynııanyń Áskerı-teńiz kúshteri Dýnaı arnasyndaǵy jartasty buzý úshin 180 keli jarylǵysh zat qoldandy. Bul týraly eldiń qorǵanys mınıstriniń mindetin atqarýshy Radý Mırýte málimdedi.
Operatsııaǵa saperler men súńgýirlerdi qosa alǵanda 100-den astam maman qatysty. Jarylys aldynda olar jynystyń beriktigin tekserip, jumys júrgiziletin aýmaqty daıyndaý úshin birneshe synaq ótkizgen.
Jartasty tek ekinshi árekette buzý múmkin boldy. Rýmynııa Áskerı-teńiz kúshteri qolbasshysynyń orynbasary Marchel Nekýlaeniń aıtýynsha, alǵashqy jarylys kútken nátıjeni bermegen, sebebi taý jynysy aldyn ala eseptelgennen áldeqaıda berik bolyp shyqqan.
Jumys aıaqtalǵannan keıin bılik Bala tarmaǵynan Eski Dýnaıǵa qaraı sý aǵynynyń baǵytyn ózgertýdi josparlap otyr. Bul ózen sýyn jabdyqtardy salqyndatý úshin paıdalanatyn Chernavode AES-ine keletin sý kólemin arttyrýy tıis.
Mundaı shuǵyl sharalar rekordtyq qýańshylyqqa baılanysty qolǵa alyndy. Dýnaıdaǵy sý deńgeıi tarıhı mınımýmǵa deıin tómendep, bul keme qatynasyna, týrızmge, ónerkásipke jáne Eýropanyń birqatar elindegi energetıka salasyna keri áserin tıgizip otyr.
Chernavode atom elektr stantsııasy Rýmynııadaǵy elektr energııasynyń shamamen besten bir bóligin óndiredi. Shilde aıynyń sońynda toqtatylǵan birinshi energobloktyń qýaty — 706,5 MVt, al jumysyn jalǵastyryp jatqan ekinshi energobloktyń qýaty — 704,8 MVt.
Eske salaıyq, Dýnaı ózenindegi sý tartylǵanyna baılanysty Majarstandaǵy jalǵyz atom stantsııasy jumysyn toqtatty.
