Rýli oń jaqtaǵy kólikterdiń kesirinen bolǵan apattar sonshalyq kóp emes - ІІM

ASTANA. QazAqparat – ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev ortalyq kommýnıkatsııalar qyzmetinde ótken brıfıngide rýli oń jaqtaǵy kólikterdi zańdastyrý qajettigi neden týyndaǵanyn túsindirdi, dep habarlaıdy QazAqparat tilshisi.

«Jalpy, búgingi kezde Qazaqstan Respýblıkasynda zańdastyrýǵa jatatyn avtokólikterdiń sany 300 myńnan asady. Sonyń ishinde rýli oń jaqtaǵy kólikterdiń sany 20 myńnan asady», - degen ІІM ókili Prezıdent tapsyrmasy aıasynda mundaı kólikterdi tirkeýge bir rettik múmkindik usynylyp otyrǵanyn eskertti.

Aıtýynsha, oń rýldi kólikterge baılanysty sheshim shyǵarý úshin arnaıy zerdeleý jumystary júrgizilgen.

«Árıne, rýli oń jaqtaǵy avtokólikter júrgizýshileriniń jol júrý qaýipsizdigin saqtaýynda biraz másele bar. Ondaı kólik ákelgender de Qazaqstannyń azamaty, bizdiń halyq qoı. Olar kóbine qarjylaı jaǵdaıy máz bolyp turǵan adamdar emes. Ondaı kólikti tapshylyqtyń saldarynan ákelip otyr. Taksı retinde paıdalanyp, otbasyn sol kólikpen asyraıdy. Sondyqtan, sol kisilerdiń jaǵdaıyna túsinistikpen qarap, bir mezgildik ruqsat berileıin dep otyr. Al endi, qaýipsizdik jaǵyna keletin bolsaq, jol apattaryn zerdelegenimizde, olardyń búgingi tańda birshama paıyz úlesi bar. Biraq, dál solardyń kinásinen bolyp jatqan jol apattary sondaı kóp dep aıta almaımyn», - dedi Qaısar Sultanbaev.