«Rólde otyryp uıyqtap ketken»: Abaı oblysynda júrgizýshi júk kóligine soǵylyp, jyraǵa qulady

Abaı oblysynda kólik tizgindep kele jatyp uıyqtap ketken er adam jol apatyna sebepker boldy, dep habarlaıdy Kazinform.

Oblystyq Polıtsııa departamenti baspasóz qyzmetiniń málimetine súıensek, jol-kólik oqıǵasy 9 qańtarda respýblıkalyq mańyzy bar «Omby-Maıqapshaǵaı» tasjolynyń 659 shaqyrymynda bolǵan.

«Kólik tizgindep kele jatyp uıyqtap ketken «Lada Granta» kóliginiń júrgizýshisi júk kóligimen soqtyǵysty. Jol apatynan keıin jeńil kólik jyraǵa qulaǵan. Abyroı bolǵanda, eshkim zardap shekken joq», - delingen aqparatta.

30 jastaǵy er adamǵa qatysty ákimshilik hattama toltyryldy.

Eske salsaq, osyǵan deıin «Óskemen-Semeı» tasjolynda jol apatynan 2 adam kóz jumǵany habarlanǵan.