Rýlge ıe bola almaǵan avtobýs júrgizýshisi polıtseıdiń ajalyna sebep boldy
ASTANA. QazAqparat - Bashqurtstanda rýlge ıe bola almaǵan avtobýs júrgizýshisi MAI qyzmetkerin basyp ketti. Ol oqıǵa ornynda ajal qushsa, ekinshi polıtseı aýrýhanaǵa jetkizildi, dep habarlady óńirlik ІІM baspasóz qyzmetinen.
Keleńsiz jaǵdaı Balachev aýdanynda jergilikti ýaqytpen saǵat 02:00-de oryn aldy. MAI ekıpajy Býraevo-Starobaltachevo avtojolynyń 17-shi shaqyrymynda jol-kólik oqıǵasyn resimdep jatqan. Eki polıtseı men patrýldik kólik jol jıeginde turǵan. Taǵy bir qyzmetker kóshede JKO resimdeý úshin joldyń enin ólshep jatqan bolatyn. «Aldyn ala derek boıynsha, aýa raıynyń qolaısyzdyǵynan rýlge ıe bola almaǵan, ishinde bes jolaýshy bar avtobýs júrgizýshisi polıtseıdi basqan kúıi toqtap turǵan patrýldik kólikke soǵylǵan», - dedi ІІM baspasóz qyzmetinen.
Saldarynan 31 jastaǵy polıtseı oqıǵa ornynda kóz jumyp, onyń 35 jastaǵy áriptesi aýdandyq aýrýhanaǵa jetkizildi.
Avtobýs jolaýshylary zardap shekken joq.
