Rýlde jelim ıiskegen atyraýlyq jigit 7 jylǵa kólik júrgizý quqyǵynan aıyryldy
Atyraý qalalyq polıtsııa basqarmasy patrýldik polıtsııa batalony komandıriniń orynbasary, polıtsııa kapıtany Ersin Qojahmetovtiń aıtýynsha, rýlde jelim ıiskep kele jatqan júrgizýshi ustalǵan.
«Jedel basqarý ortalyǵynyń qyzmetkerleri 15 tamyzda saǵat 17:55 shamasynda Atyraý qalasynyń Qurmanǵazy-T.Bıgeldınov kósheleriniń qıylysynda VAZ – 2115 avtokóliginiń júrgizýshisi kúdik týdyrǵanyn baıqaǵan. Bul týraly patrýldik polıtsııa qyzmetkerlerine habar bergen. Ustalǵan 1994 jylǵy júrgizýshi medıtsınalyq saraptamaǵa jetkizildi. Dárigerdiń medıtsınalyq qorytyndysyna sáıkes, júrgizýshiniń ushpa (jelim) eritindisin tutynǵany anyqtaldy. Júrgizýshige qatysty QR Ákimshilik quqyq buzýshylyq týraly kodeksiniń 608-babynyń 1-bóligimen ákimshilik hattama toltyryldy», - dep habarlady Ersin Qojahmetov.
Onyń aıtýyna qaraǵanda, polıtsııa qyzmetkerleri jınaqtalǵan is-qujattaryn mamandandyrylǵan ákimshilik sotyna joldaǵan. Sot sheshimimen jelim ıiskegen jigit 15 táýlikke ákimshilik qamaýǵa alynyp, 7 jyl merzimge kólik quralyn basqarý quqyǵynan aıyryldy.
«Turǵyndar quqyq buzýshynyń kólik júrgizý kezinde esirtki tektes zatty paıdalanǵanyn beınejazbaǵa túsirip, áleýmettik jelige taratqan. Mundaı jaǵdaıdy 102 operatoryna nemese qosymshasyna, Telegram jelisindegi Belsendi azamattar 06 jumys tobyna jiberýge bolatynyn habarlaımyz», - dep málim etti Ersin Qojahmetov.
Eske sala ketelik, budan buryn Atyraý oblysynda keıingi eki aıda 4 jol apatynan 20 adam mert bolǵanyn jazǵan edik.
