Rýlde mas kúıde ustalǵan Rıdder turǵyny ómir boıy kólik júrgizý quqyǵynan aıyrylýy múmkin

RIDDER. QazAqparat - Rıdder qalasynyń turǵyny kólikti mas kúıde júrgizgeni úshin ómir boıyna kólik quralyn basqarý quqyǵynan aıyrylýy múmkin, dep habarlaıdy QazAqparat Shyǵys Qazaqstan oblysy Polıtsııa departamentine silteme jasap.

24 sáýirde saǵat 00:05-te Rıdder qalasyndaǵy ónerkásip bazasy mańynda patrýldik polıtsııa qyzmetkerleri 7 jylǵa kólik quralyn basqarý quqyǵynan aıyrylǵan bola tura, mas kúıde kólik júrgizgen 37 jastaǵy turǵyndy ustaǵan.

«Atalǵan fakti boıynsha Qylmystyq kodekstiń 346-baby 1-bóligimen «kólik quralyn basqarý quqyǵynan aıyrylǵan jáne masań kúıdegi tulǵanyń kólik quralyn basqarý» faktisi boıynsha sotqa deıingi tergeý bastaldy. Qazirgi ýaqytta júrgizýshi ustalyp, ýaqytsha ustaý ızolıatoryna qamaýǵa alyndy.
Birqatar sot saraptamasy taǵaıyndaldy, onyń nátıjesi boıynsha protsestik sheshim qabyldanady», delingen habarlamada.
Atalǵan qylmystyq quqyq buzýshylyqty jasaǵany úshin 5 jylǵa deıin bas bostandyǵynan aıyrý jáne ómir boıyna kólik quralyn basqarý quqyǵynan aıyrý jazasy kózdelgen.
Sotqa deıingi tergeý júrip jatyr.

Aıta keterligi, jyl basynan beri oblystyq polıtsııa departamentiniń aýmaqtyq bólimsheleri kólik quralyn basqarý quqyǵynan aıyrylǵan jáne mas kúıdegi tkólik júrgizgen 33 fakti tirkelgen, 24 fakti boıynsha aıyptaý úkimi shyǵaryldy.