«Ruqsattar men habarlamalar týraly» Zań jobasy 1 sáýirge deıin Parlament qaraýyna engiziledi
ASTANA. QazAqparat - Búgin Úkimet otyrysynda «Ruqsattar men habarlamalar týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesi máseleler boıynsha ózgerister men tolyqtyrýlar engizý týraly» QR Zań jobalary maquldandy.
«Zańnyń qabyldanýy Úkimet resýrstaryn durys bólýge múmkindik beredi. Osyǵan oraı qyrkúıekte memlekettik baqylaý máseleleri jónindegi jańa zań jobasyn, al jyl sońyna qaraı ózin-ózi retteý týraly zań jobasyn Parlamentke engizý qajet», - dedi otyrysty qorytyndylaǵan Premer-Mınıstr Serik Ahmetov.
Sonymen qatar Úkimet basshysy 1 sáýirge deıin Óńirlik damý mınıstrligine búgingi otyrysta talqylanǵan zań jobasyn Májilis qaraýyna engizýdi tapsyrdy.
«Sonymen qatar atalǵan zań jobalar málimetteriniń shuǵyl retinde jarııa etilgendigi týraly Memleket basshysynyń atyna hat jobasyn ázirleý qajet. Biz bul jaıynda sóılestik jáne Memleket basshysy bul máselege qoldaý bildiredi», - dedi ol.
