Ruqsat etilmegen jerde shomylǵan almatylyqtarǵa aıyppul salyna bastady

ALMATY. QazAqparat – Shomylý maýsymy bastalǵanyna qaramastan, karantın aıaqtalǵanǵa deıin sýda shomylatyn jappaı demalý oryndaryna barýǵa ruqsat etilmeıdi, dep habarlaıdy QazAqparat tilshisi qalalyq tótenshe jaǵdaılar departamentine silteme jasap.

Alaıda, qalanyń jabdyqtalmaǵan sý qoımalarynda sýǵa shomylý faktileri bar. Patrýl kezinde eki almatylyq tyıym salynǵan jerde sýǵa shomylǵany úshin ákimshilik jaýapkershilikke tartyldy.

Jazǵy demalysqa shyqqan almatylyq oqýshylar jappaı sý toǵandaryna baryp, kóshelerge shyǵady. Osyǵan baılanysty sý qoımalarynyń jaǵalaýyn nyǵaıtý úshin mektep qyzmetkerleri, aýdan ákimdikteri jáne Ulttyq ulan qyzmetkerleri qutqarýshylar men polıtsııa patrýline qosyldy.

Esterińizge sala keteıik, qala sheginde 26 sý qoımasy bar. Onyń 4-inde shomylýǵa ruqsat etilgen. Olar:

- Saıran ózeniniń batys bóligi (Tóle bı kóshesinen ońtústik baǵytqa qaraı pırsqa deıin 300 metr)

- Saıran ózeniniń shyǵys bóligi (Tóle bı kóshesinen ońtústik baǵytqa qaraı 200 metr)

- D. Qonaev atyndaǵy Úlken Almaty kanaly boıyndaǵy «Baým» toǵaıynyń shomylý aımaǵy

- D. Qonaev atyndaǵy Úlken Almaty kanaly boıyndaǵy «Gúlder» demalys orny.

Qala aýmaǵynda ornalasqan basqa sý qoımalary men taý ózenderine (Esentaı, Kishi jáne Úlken Almaty kanalyna) shomylýǵa tyıym salynady.

Qazirgi ýaqytta Saıran kóliniń jartylaı toltyrylǵanyna qaramastan qutqarý beketi jumys istep tur. Sondaı-aq, Túrksib aýdanyndaǵy Áýejaı ózeninde respýblıkalyq jedel-qutqarý jasaǵynyń qutqarýshylary kezekshilik etip júr.

Sonymen birge, Áýejaı ózeninde jańa qutqarý stansasyn salý máselesi qaralyp, qazirgi ýaqytta jobalyq-smetalyq qujattama ázirlenip jatyr.