Ruqsat berý júıesin jetildirýge baǵyttalǵan zań jobasy kelisim komıssııasynyń qaraýyna shyǵarylady
ASTANA. 21 sáýir. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine ruqsat berý júıesin jetildirý máseleleri boıynsha
ózgerister men tolyqtyrýlar engizý týraly» zań jobasy boıynsha qos palata arasynda kelisim komıssııasyn qurý týraly máseleni qarady. Esterińizge sala keteıik, buǵan deıin Májilis maquldaǵan zań jobasyna Senat birqatar túzetý jasap, qujatty keri qaıtarǵan bolatyn. Osyǵan oraı, Májilis tarapynan kelisim komıssııasyn qurý týraly bastama jasaldy.
Zań jobasyna keletin bolsaq, qujat ruqsat berý salasyndaǵy zańnamany odan ári jetildirýge arnalyp otyr. Memleket basshysynyń joldaýlarynda Úkimetke ákimshilik reforma sheńberinde bızneske túsetin ákimshilik júktemeni batyl azaıtý, ruqsat berý júıesin, eń aldymen lıtsenzııalaýdy, sertıfıkattaýdy, akkredıtteýdi odan ári ońaılatýdy tapsyrǵan bolatyn. Osy maqsatty júzege asyrý úshin atalǵan zań jobasy ázirlengen. Zań jobasymen 54 zańnamalyq aktige, onyń ishinde 5 kodeks pen 49 zańǵa ózgerister engiziledi. Engizilgen ózgerister jekelegen ruqsat berý qujattaryn berý jónindegi normalardy, artyq talaptardy, zańnamalyq aktiler normalarynyń arasyndaǵy qaıshylyqtardy alyp tastaýǵa septigin tıgizedi. Budan bólek, qujatta lıtsenzııa berý merzimin qysqartýǵa, qyzmet túrleriniń ataýlaryn ózgertý jolymen jekelegen qyzmet túrlerin lıtsenzııalaý jónindegi talaptardyń qoldanylý salasyn yqshamdaýǵa baǵyttalǵan normalar qamtylady.
Kelisim komıssııasynyń quramyna Senat tarapynan tórt depýtat usynyldy. Olar - Talǵatbek Abaıdildın, Serik Aqylbaı, Mıhaıl Bortnık, Qaısar Omarov.
