Ruqsat berý qujattary taǵy da qosymsha 30 paıyzǵa qysqartylady - zań jobasy
ASTANA. 25 maýsym. QazAqparat - Búgin QR Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetinde «Qazaqstan Respýblıkasynyń keıbir zanamalyq aktilerine ruqsat berý qujattaryn qysqartý jáne memlekettik organdardyń baqylaý-qadaǵalaý fýnktsııalaryn ońtaılandyrý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Atalǵan zań jobasy Memleket basshysynyń lıtsenzııalar men ruqsat berý qujattarynyń sanyn taǵy da qosymsha 30 paıyzǵa qysqartý týraly tapsyrmasyn oryndaý maqsatynda ázirlengen. Bul rette zań jobasymen qoldanystaǵy 80 zańnamalyq aktilerge ózgerister engizý kózdeledi. Olar lıtsenzııalaý prıntsıpterine sáıkes kelmeıtin qyzmettiń jekelegen túrlerinen lıtsenzııalaýdy joıýǵa, memlekettik organdardyń baqylaý-qadaǵalaý fýnktsııalaryn qysqartýǵa jáne ońtaılandyrýǵa baǵyttalady.
«Zań jobasy boıynsha elimizde anyqtalǵan 1 myń 96 ruqsat berý qujatynyń joǵary qaterdegi qaýipsizdikti qamtamasyz etýge áser etpeıtin 257-isiniń kúshin joıý qarastyrylady. Aqparattyq sıpattaǵy azamattardyń ómiri men densaýlyǵyna tikeleı qaýip-qater keltirmeıtin 40 ruqsat berýdi habarlama tártibine kóshirý kózdeledi. Osylaısha barlyǵy 30 paıyzǵa jýyq ruqsat berý qujattary qysqartylady. Budan bólek, keıbir ruqsat qujattarynyń ornyna alǵash ret habarlama tártibi engizilip otyr», - deıdi zań jobasy boıynsha baıandaǵan Ekonomıkalyq damý jáne saýda vıtse-mınıstri Marat Qusaıynov.
