Ruqsat berildi: «Jomart» kenishiniń jumysy qaıta jandanatyn boldy
ASTANA. KAZINFORM — Ulytaý oblysyndaǵy «Jomart» kenishiniń jumysy qaıta iske qosylatyny týraly «Qazaqmys korporatsııasy» JShS Basqarma tóraǵasy Nurahmet Nýrıev málim etti.
Bıylǵy jyldyń 17 aqpanynda «Jomart» kenishinde qaıǵyly oqıǵa bolǵanyn eske sala keteıik.
— Biz jaýapkershilikten jaltarmaımyz. Árbir qyzmetkerdiń qaýipsizdigin qamtamasyz etý — bizdiń tikeleı mindetimiz jáne abyroıly boryshymyz. Oqys oqıǵadan sabaq alýǵa mindettimiz jáne onyń qaıtalanbaýy úshin bar kúshimizdi salýǵa tıispiz. Sol sebepti qaıǵyly oqıǵanyń alǵashqy kúninen bastap, apattyń saldaryn joıý jáne óndiristik jumysty qaýipsiz jaǵdaıda qaıta bastaý úshin aýqymdy ári júıeli jumys júrgizildi. Biz ǵylymnyń jetistigine, úzdik mamandardyń tájirıbesine jáne osy oqıǵaǵa beıjaı qaramaıtyn jandardyń ortaq kúshine súıenemiz, — dedi basqarma basshysy.
Bul jumysqa jetekshi ǵylymı jáne ınjenerlik uıymdar jumyldyryldy, keshendi zertteý júrgizilip, monıtorıng pen baqylaý júıeleri engizildi, memlekettik qadaǵalaý organdarymen kelisilgen tehnıkalyq sheshim ázirlendi.
— Ǵylymı-zertteý ortalyqtary, tehnıkalyq jáne saraptamalyq uıymdar men kompanııamyzdyń jumyskerleri birigip atqarǵan tyńǵylyqty jumystyń nátıjesinde «Jomart» kenishinde óndiristi qaıta bastaýǵa resmı túrde ruqsat berildi. Atalǵan sheshim kenjarlardyń jaǵdaıy, qaýipsizdik deńgeıi jáne qyzmetkerlerdiń daıyndyǵy jan-jaqty saralanǵan soń qabyldandy, — dedi Nurahmet Nýrıev.
Eske sala keteıik, Ulytaý oblysyndaǵy shahtada apat bolyp, 7 adam tótenshe jaǵdaıda qalǵan edi.
Keıin kabelderdiń úzilýine baılanysty jumysshylarmen baılanys joqtyǵy aıtyldy.
Shahta astynda qalǵan qalǵan jumysshylardyń barlyǵy mert bolǵany anyqtaldy.
Memleket basshysy Ulytaý oblysynda kenshilerdiń qaza tabýyna baılanysty kóńil aıtty.
Aıta keteıik, qaza tapqan kenshilerdiń otbasylaryna járdemaqylar men tólemder taǵaıyndalady.
Sondaı-aq Ulytaý oblysynda shahtanyń opyrylýyna baılanysty úkimettik komıssııa quryldy.