«Rýhy berik el erteńine senimdi» - respýblıkalyq basylymdarǵa sholý

***

«Qazaqstan Respýblıkasynyń Prezıdenti - Qarýly Kúshterdiń Joǵarǵy Bas qolbasshysy Nursultan Ábishuly Nazarbaev óńirdegi jumys saparyn Taldyqorǵan áskerı garnızonynyń quramalary men bólimderinde bolýdan bastady. Avıatsııa bazasynyń áýejaıynda Nursultan Ábishuly quramanyń avıatsııalyq tehnıkasymen, onyń jaýyngerlik múmkindikterimen tanysty», dep jazady «Egemen Qazaqstan» búgingi nómirinde jaryq kórgen «Rýhy berik el erteńine senimdi» degen maqalasynda. Basylymnyń jazýynsha, Elbasy sondaı-aq Taldyqorǵan shaharynda boı kótergen «Nazarbaev zııatkerlik mektebinde», Til saraıynda, Dostyq úıinde bolyp, olardyń tynys-tirshiligimen de jete tanysqan. Maqalanyń tolyq nusqasyn basylymnyń juma kúngi sanynan egjeı-tegjeıli oqı alasyzdar.

Memleket basshysynyń Almaty oblysyna jasaǵan jumys sapary búgin jaryq kórgen respýblıkalyq basylymdardyń da nazarynan tys qalmady. Atap aıtqanda, Elbasynyń jumys sapary jaıynda «Aıqyn», «Alash aınasy», «Kazahstanskaıa pravda», «Lıter» syndy basylymdardan da egjeı-tegjeıli oqı alasyzdar.

«Egemen Qazaqstan» gazetiniń baıandaýynsha, keshe Premer-Mınıstr, Dırektorlar keńesiniń tóraǵasy Kárim Másimovtiń qatysýymen «Samuryq-Qazyna» ulttyq ál-aýqat qory basqarmasynyń keńeıtilgen otyrysy bolyp ótti. Alqaly jıynda sóz alǵan qor basqarmasynyń tóraǵasy Qaırat Kelimbetov Úkimettiń daǵdarysqa qarsy baǵdarlamasyn júzege asyrýdaǵy eń belsendi kezeńniń 2009 jylǵa sáıkes kelgenin tilge tıek etken. Aǵymdaǵy jyly qor jumysynda ekonomıkany qaıta jańǵyrtýǵa yqpal jasaýǵa jáne qor kompanııalaryndaǵy korporatıvtik basqarýdy jetildirýge basymdyqtar berilip otyr. Birinshi baǵyt boıynsha údemeli ındýstrııalyq-ınnovatsııalyq damýdyń memlekettik baǵdarlamasyndaǵy jobalardy júzege asyrýǵa mańyzdy ról bólinedi. Osylaısha eldi ındýstrııalandyrý kartasy sheńberinde 43 mıllıard AQSh dollary turatyn jobalardy júzege asyrý josparlanǵan. Osy qarjynyń 22 mıllıard dollary nemese 50 paıyzdan astamy qordyń úlesine tıesili. Indýstrııalandyrý kartasyna qordyń 53 jobasy enip otyr. Olardyń 35-i respýblıkalyq mańyzdaǵy, 18-i óńirlik jobalar bolyp tabylady. Joǵaryda atalǵan 53 jobanyń 32-sin Qazaqstannyń Damý banki arqyly júzege asyrý kózdelýde. Al qalǵan 21-i "QazMunaıGaz", "Qazaqstan temir joly", KEGOK, "Samuryq-Energo" sııaqty enshiles kompanııalar arqyly júzege asyrylatyn bolady.

«Tamyzdyń 11-inde ShYU-ǵa múshe memleketter Syrtqy ister mınıstrler keńesiniń tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev Qazaqstannyń ShYU tóraǵalyǵy aıasynda ShYU-ǵa qatysýshy memleketterdiń Ulttyq úılestirýshilerin jáne ShYU hatshylyǵy basshylaryn qabyldady», dep jazady «Egemen Qazaqstan» gazeti. Q. Saýdabaev ShYU aǵymdaǵy qyzmetiniń negizgi úılestirýshi mehanızmderiniń erekshe ınstıtýty bolyp tabylatynyn atap ótip, Ulttyq úılestirýshiler keńesiniń jumysyna joǵary baǵa berdi. Sondaı-aq múshe memleketter men Uıymnyń turaqty qyzmet etetin organdaryna uıym tarıhynda alǵash ret oryn alyp otyrǵan 2010-2011 jyldarǵa arnalǵan ShYU is-qımyl jospary jóninde qazaqstandyq bastamalardy qoldaǵandary úshin alǵys bildirdi. Sonymen qatar, múshe memleketterdiń ortaq kúsh-jigeri, Ulttyq úılestirýshiler keńesiniń úılestirýshilik róli jáne Hatshylyq pen óńirlik antıterrorlyq qurylymnyń qoldaýymen ShYU óziniń 10 jyldyq mereıtoıyna arnalǵan 2011 jyly Astanada ótetin sammıtti joǵary ári sapaly deńgeıde ótkizýge daıyndyqtyń júıeli qamtamasyz etiletinine senim bildirdi.

***

«Alash aınasy» gazetiniń dástúrli «Dat!» aıdarynda medıtsıa ǵylymynyń doktory, QR Kardıologtar qaýymdastyǵynyń prezıdenti Spandııar Bekjigitovpen aradaǵy suhbat «Árbir azamatty dárigerlik tekserýden ótýge mindetteıtin zań kerek» degen taqyryppen basylǵan. Basylym tilshisiniń barlyq saýaldaryna tuşymdy jaýap bergen ol «júrek-qan tamyrlary aýrýlarynan qaıtys bolýdy azaıtý úshin eń birinshi, halyqtyń ál-aýqatyn kóterip, olardyń júıke júıesine túsetin salmaqty azaıtý qajet. Árbir azamatty jyl saıyn profılaktıkalyq tekserýden ótýge mindetteıtin zań kerek. Sondaı-aq árdaıym dárigerlik sharalardy júrgizý otyryp, ekologııalyq máselelerdi der kezinde sheshkenimiz jón. Barlyq deńgeıde shtat qurylymdaryn tolyq kardıolog mamandarmen qamtamasyz etýge tıispiz. Reabılıtatsııalyq ortalyqtar ashý kerek. Sonymen qatar dári-dármektiń baǵasyn qalypqa keltirip, medıtsınalyq saqtandyrýdy damytýymyz qajet», depti.

«Sońǵy kezderi elimizdiń túrmelerindegi dúrbeleń tynshymaı tur. Biriniń jańǵyryǵy basylmaı jatyp kelesisi estiledi. Tipti Aqtaý túrmesindegilerdiń tepkini birqatar Qylmystyq-atqarý júıesi komıtetiniń basshylaryn qyzmetinen ketirdi. Túrli aldyn alý sharalarynyń bolyp jatqanyna qaramastan, qapastaǵy qarsylyqtar neniń belgisi? Túrmedegi tártipsizdik ondaǵy adam tózgisiz jaǵdaıdan týyndap otyr ma álde sottalǵandardyń ózderine nazar aýdartý maqsatynda jasap jatqan áreketteri me?», dep jazady «Alash aınasy» gazeti. Osyǵan oraı basylym atalǵan oqıǵalardyń astaryna úńilip, óz baǵamdaryn jasaýǵa umtylǵan. Maqalamen keńirek tanysqynyń kelse, juma kúngi sandaǵy «Túrmeden nege tynyshtyq qashty?» degen maqalaǵa nazar aýdaryńyz.

***

«Keshe Reseı Áýe-qorǵanys kúshteriniń qolbasshysy Aleksandr Zelın: «Abhazııada Reseıdiń S-300 zenıttik-zymyrandyq kesheni ornatyldy. Endi Abhazııa aspanyndaǵy jylt etken núkteni de joıyp jiberýge bolady» dep málimdeme jasady. Bir aıta keter jaıt, 2008 jylǵy tamyzda bolǵan Grýzııa men Ońtústik Osetııadaǵy soǵystan keıin-aq Reseı Abhazııaǵa S-300 keshenin ornatqan», dep jazady «Aıqyn» gazeti. Maqalanyń tolyq nusqasyn basylymnyń búgingi nómirindegi «Reseı shekarasyn «qymtap» jatyr» degen maqaladan oqı alasyzdar.

Erteń Panamadaǵy Roberto Dýran atyndaǵy arenada Qazaqstannyń tanymal kásipqoı boksshysy Gennadıı Golovkın WBA tujyrymy boıynsha ýaqytsha álem chempıony ataǵy úshin aıqasady. Bul aqparatty «Aıqyn» gazeti taratyp otyr. «72,6 keli salmaq dárejesinde kúsh synasyp júrgen 28 jastaǵy jerlesimiz kásipqoı rıngke aýysqaly beri áli birde-bir ret jeńilgen emes. Ol barlyq qarsylasyn aıqyn basymdylyqpen utyp, qandaı da qurmetke laıyq ekenin dáleldeı aldy. Endi Gennadıı ýaqytsha álem chempıony ataǵy úshin talasqa túsedi. Onyń qarsylasy - 22 jastaǵy Kolýmbııa boksshysy Mılton Nýnez. Ol 21 ret jekpe-jekke shyǵyp, 19-yn óz paıdasyna sheshti. Bir ret utylyp, bir básekeni teń aıaqtady», dep jazady basylym.

***

«Elbasy Nursultan Nazarbaev Joǵarǵy Sot Tóraǵasy Musabek Álimbekovty qabyldady», dep jazady «Kazahstanskaıa pravda» gazeti Prezıdenttiń baspasóz qyzmetine silteme jasap. M.Álimbekov Memleket basshysyna respýblıkadaǵy sot tóreligi júıesiniń jaǵdaıy týraly baıandady. Atap aıtqanda, azamattyq ister boıynsha sot tóreliginiń ornyn toltyrýdy qalpyna keltirý qaǵıdatyn iske asyrý jaıy qozǵaldy. Kezdesý barysynda sondaı-aq aldaǵy ýaqyttaǵy quqyq salasyndaǵy ózgerister, Qazaqstannyń Joǵarǵy Sotynyń Eýropa men Azııa elderiniń sottarymen ózara is-qımyly týraly áńgime boldy.