Rýhqa taǵzym: Astanada Baýyrjan Momyshulynyń 115 jyldyǵyna arnalǵan plats-kontsert ótti
ASTANA. KAZINFORM — Elordada «EXPO» halyqaralyq kórme ortalyǵynda ornalasqan AlemAI kúmbezi astynda dańqty qolbasshy, Halyq Qaharmany, Keńes Odaǵynyń Batyry Baýyrjan Momyshulynyń týǵanyna 115 jyl tolýyna arnalǵan plats-kontsert uıymdastyryldy.
Іs-shara QR Memlekettik kúzet qyzmetiniń Prezıdenttik orkestri men rásimdik bólimshesiniń qatysýymen ótti.
— Bul kontserttiń basty maqsaty — jastardyń boıynda otansúıgishtik sezimdi qalyptastyrý, elge, jerge degen súıispenshilikti arttyrý. Baýyrjan Momyshuly — biz úshin áskerı tártiptiń, batyldyq pen kásibı sheberliktiń aıqyn úlgisi. Ol ofıtser qandaı bolýy kerek ekenin kórsetti, — dedi QR Memlekettik kúzet qyzmeti Aıbyn Prezıdenttik polki 0112 áskerı bóliminiń birinshi basqarma bastyǵy, podpolkovnık Qaırat Moldabaev.
Plats-kontsertke Prezıdenttik úrlemeli aspaptar orkestri, «Abyroı» toby, sondaı-aq QR Memlekettik kúzet qyzmetiniń «Aıbyn» Prezıdenttik polki rásimdik bólimshesi men «Sardar», «Kókjal» arnaıy maqsattaǵy jasaqtary qatysty.
Qoıylym barysynda qarýmen kórsetiletin áskerı elementter men defıle usynyldy.
Aıta keteıik, plats-kontsert barysynda «Elim dep soqsyn júregiń», «Rýh», «Saýyt» sekildi patrıottyq ánder oryndalyp, QR Memlekettik kúzet qyzmeti Prezıdenttik orkestriniń solısteri jańa «Kók aspan» kompozıtsııasyn usyndy.
— Baýyrjan Momyshuly — Qazaqstannyń ulttyq qaharmany. Biz onyń erligi men minezin úlgi tutamyz, — dedi sharaǵa qatysqan áskerı qyzmetshi.
Aıta keteıik, 115 jyldyq mereıtoıyna arnalǵan «Baýyrjan Momyshuly jáne jańa arhıv derekteri» atty respýblıkalyq ǵylymı-praktıkalyq konferentsııada onyń buryn belgisiz bolǵan qujattary kórmege qoıyldy.