«Rýhqa aınalǵan tulǵalarym - Elordasynda áz dalamnyń» - respýblıkalyq basylymdarǵa sholý

***

Maýsymnyń 1-i kúni Astanadaǵy QR Tuńǵysh Prezıdenti murajaıynyń saıabaǵynda Qazaq handyǵyn qurýshy Kereı men Jánibekke arnalǵan monýmentti músindik-kompozıtsııany Elbasy Nursultan Nazarbaev ashyp, sóz sóıledi. Osyǵan oraı «Egemen Qazaqstan» gazetiniń sársenbilik sanynda «Ulystyń ulylary Astanada asqaqtady» degen taqyryppen maqala jarııalandy. Maqalada «búgin asqaq Astanamyz taǵy bir taǵlymy mol sáýlet týyndysymen tolyqty. Biz elordamyzdyń tórinde ulysymyzdy uıystyrǵan Kereı men Jánibek handarǵa arnalǵan eńseli eskertkish ashyp otyrmyz. Bul tuǵyrly tarıhymyzǵa, bizdiń qazaqy, eldik dástúrimizge, myzǵymas memleketimizge arnalǵan máńgilik belgi», dep atap ótken Memleket basshysynyń sózi keltirilgen.

Qazaq halqy úshin aıtýly oqıǵany «Alash aınasy» gazeti de nazarynan tys qaldyrmaı búgingi nómirine «Rýhqa aınalǵan tulǵalarym - Elordasynda áz dalamnyń» degen taqyryppen maqala basqan. «Salıhaly Saryarqa, eńseli elorda apaıtós keýdesine tarıhtyń tereń tunbasynan terip alǵan taǵy bir injý-marjandy qadady. Qara orman qazaq ıistiniń tuńǵysh han tutqan qos arysy Kereı men Jánibek handardyń jańadan jasalǵan eskertkishteri, Astananadaǵy burynǵy Prezıdent rezıdentsııasynyń, qazirgi Qazaqstannyń Tuńǵysh Prezıdenti murajaıynyń aldyndaǵy shaǵyn saıabaq alańyna qoıyldy. Alash jurtynyń jigerin janyp, qazaq eliniń qadirin arttyrǵan aıtýly sharaǵa Elbasy Nursultan Nazarbaev arnaıy qatysty», dep jazady basylym.

«Keshe Beıbitshilik jáne kelisim saraıynda Saýd Arabııasy Koroldiginiń Qazaqstandaǵy mádenıet kúnderiniń elordadaǵy ashylý rásimi ótip, aıshyqty sátter kóp kóńiline shýaqty áser qondyrdy», dep jazady «Egemen Qazaqstan» gazeti. Mádenı shara qasıetti Quran-Kárimniń aıatyn júrek tolqyr maqammen oqýmen bastalyp, eki eldiń mádenıet salasy basshylarynyń quttyqtaý lebizderimen jalǵasty. Elimizdiń Mádenıet mınıstri Muhtar Qul-Muhammed arab baýyrlardyń elordaǵa kelýi úlken tarıhı oqıǵa bolyp sanalatyn, sebebi Saýd Arabııasy Koroldiginiń mádenıet kúnderi Qazaq eliniń astanasynda tuńǵysh ret ótkizilip otyrǵandyǵyn atap ótip, ıslam órkenıetindegi murat-múddesi biregeı elderdiń saıası-ekonomıkalyq áleýmettik-mádenı, dıplomatııalyq baǵyttaǵy baılanystary qarqyndy damyp kele jatqanyn baıandaǵan.

2010 jylǵy mamyrdyń 28-inde Sankt-Peterbor qalasynda bolyp ótken Keden odaǵynyń joǵarǵy organy otyrysynyń qorytyndylary boıynsha Qazaqstan Respýblıkasy men Reseı Federatsııasy arasynda Keden odaǵyn qurý sheńberinde halyqaralyq kelisimderdi qoldaný týraly shartqa qol qoıyldy. Osyǵan oraı «Egemen Qazaqstan» gazetiniń búgingi nómirinde QR Úkimetiniń Kedendik odaqqa qatysty málimdemesi jarııalandy. «Bizdiń elimiz úshin azamattarymyz jeńil avtomobılderdi ákelgen kezdegi kedendik baj salyqtarynyń óte názik másele bolyp tabylatyny belgili. Kúrdeli kelissózder nátıjesinde biz Qazaqstan úshin azamattarymyzǵa, buryn Qazaqstanda kúshinde bolǵan rejimnen de góri beıtaraptaý, jeńildikti rejimdi qarastyratyn alymdar engizý jóninde kelisimge keldik», delingen málimdemede.

***

«Qyzyljar qazaqtary quqyq qorǵaý organdarynyń áreketsizdigine narazy. Osydan bir aı buryn tapa tal túste on shaqty adam ulty qazaq, aǵaıyndy eki jigitti tepkiniń astyna alyp, travmatıkalyq qarýmen atyp, aýrýhanadan bir-aq shyǵarǵan bolatyn. Polıtseıler izin sýytpaı shabýyldaýshylardy qolǵa túsirgen-di. Qarý asynǵandar armıan ultynyń ókilderi bolyp shyqty», dep jazady «Alash aınasy» gazeti «Ushqynnan ot shyǵaryn nege eskermeımiz?» degen taqyryppen berilgen maqalasynda. Basylymnyń baıandaýynsha, eki táýlikten keıin qalalyq prokýratýra kúdiktilerdi bosatyp jibergen. Munymen kelispegen tergeýshi oblystyq prokýratýraǵa júgingen. Biraq olar da qarý asynǵandardyń isinen qylmystyq áreket «baıqaı» almapty. Oqıǵanyń egjeı-tegjeıin basylymnyń búgingi sanynan bile alasyzdar.

«Alash aınasy» gazetiniń jazýynsha, Qyrǵyzstannyń ýaqytsha úkimeti men jergilikti halyq jappaı tártipsizdikterdiń elge bereke ákelmeıtinin endi túsinip, ekonomıkany damytýdy qolǵa aldy. Al qyrǵyz ekonomıkasynyń tez saýyǵatyn ári mol tabysty salasy, burynǵysynsha - týrızm. Sol sebepti bılik pen qyrǵyz kásipkerleri Ystyqkól týrısteriniń qatary azaıǵanyna alańdaýly. Olar ekonomıkalyq ahýaldy retteý úshin sheteldikterdiń, ásirese demalys aımaǵyna burynǵy turaqty klıentter - qazaqstandyqtardyń qaıta aǵylǵanyn qalaıdy. Qyrǵyz eliniń birqatar memleket qaıratkerleriniń pikirleri qosa berilgen maqala basylymda «Meımanyn ańsap kól jatyr» degen taqyryppen basyldy.

***

«Aıqyn» gazetiniń dástúrli «Aq sóıle!» aıdarynyń sársenbilik qonaǵy - senator, EQYU tóraǵasynyń musylmandardy kemsitýshilikke qarsy kúres jónindegi jeke ókili Ádil Ahmetov. Basylym tilshisiniń barlyq saýaldaryna tuşymdy jaýap bergen senatordyń suhbaty «Musylman áleminiń ǵalamdyq órkenıetke qosqan úlesi óte salmaqty» degen taqyryppen berilgen.

Almatynyń kúre tamyryna aınalyp jatqan Ál-Farabı dańǵylynyń Remızovka eldi mekenimen qıylysqan núktesinde eski qorymnyń qazirgi jaı-kúıi bıliktiń de, din ókilderiniń de jiti baqylaýynda turǵanyna bir-eki aıdyń júzi boldy. Osy jaıt arqaý bolǵan maqala «Aıqyn» gazetinde «Remızovka» qorymy kóshiriledi» degen taqyryppen berildi. Basylymnyń jazýynsha, atalǵan qorym taý bókterinde ornalasqan ári 2011 jyly elimizde ótetin Azıada oıyndary úshin salynyp jatqan tranplınnen qashyq emes. Osyǵan oraı Almaty ákimdigi zań sheńberinde qorymdaǵy súıekterdi basqa jerge kóshirýdi qolǵa alǵan.