Rýhııa Baıdúkenova: Roza Rymbaevadan bata alý men úshin úlken baqyt
ASTANA. KAZINFORM — Qytaıda ótetin Silk Way Star halyqaralyq mýzykalyq baıqaýynyń ekinshi maýsymynda Qazaqstan namysyn qorǵaıtyn ánshi Rýhııa Baıdúkenova Jibek Joly telearnasynyń «Búgin.LIVE» baǵdarlamasynda jobaǵa daıyndyq barysy týraly aıtty.
Onyń aıtýynsha, óner jolynda erekshe qoldaý kórsetken tulǵalardyń biri — Qazaqstannyń halyq ártisi Roza Rymbaeva.
— Roza Qýanyshqyzy meni alǵash ret «Top jarǵan» jobasynan kórgen eken. Keıin Slavıan bazaryna irikteý kezeńinde jolyqtyq. Birde men ótpeı qalǵan kezde efır boıy «osy qyz ótýi kerek edi» dep aıtyp otyrǵanyn keıin estidim. Keıin Qazaqstan atynan halyqaralyq baıqaýǵa shyǵatynymdy alǵash habarlaǵan da Roza Qýanyshqyzy boldy, — deıdi Rýhııa.
Ánshi buǵan deıin qatysqan, óner jolynyń bastamasy jaıly da sóz qozǵady. Sonyń biri «Slavıan bazaryna» deıingi joldyń ońaı bolmaǵanyn jasyrmady.
— Slavıan bazaryna birneshe ret talpynyp baryp qatystym. Birinshi jyly jetekshim «sen barasyń, jeńesiń, biraq saǵan aryqtaý kerek» degen edi. Ekinshi jyly da baǵymdy synadym, biraq óte almadym. Úshinshi jyly Dımash aǵa habarlasyp, «osy joly mindetti túrde kastıngke barýyń kerek» dep qoldaý kórsetti. Sodan keıin tyńǵylyqty daıyndaldym. Eki-úsh aıdyń ishinde 23 keli salmaq tastap, baıqaýǵa baryp jeńip keldim, — dedi ánshi.
Rýhııa Baıdúkenova qazir Qytaıda ótetin Silk Way Star halyqaralyq jobasyna daıyndalyp jatyr. Ánshiniń sózinshe, bul baıqaý Azııadaǵy eń aýqymdy mýzykalyq jobalardyń biri sanalady.
— Bul baıqaýdy burynnan baqylap júrdim. Birinshi maýsym jeńimpazy Mıshelmen de keıin tanystym. Silk Way Star — Azııa elderiniń «Evrovıdenıe» jobasyndaı deńgeıi óte joǵary. Byltyr qatysqym kelgen, qalaı qatysýǵa bolatynyn surap júrdim. Sondyqtan usynys túskende birden kelistim, — dedi ánshi.
Ol qazirgi ýaqytta repertýar tańdaý, horeografııa jáne fızıkalyq daıyndyqqa erekshe kóńil bólip júrgenin aıtty.
— Maǵan qazir Qazaqstan da, Qytaıdaǵy áriptesterim de úlken úmit artyp otyr. Sondyqtan jaýapkershilik eki ese. Daýysymdy saqtap, densaýlyǵyma mán berip júrmin. Mundaı jobalarda psıhologııalyq daıyndyq ta asa mańyzdy, — dedi Rýhııa Baıdúkenova.
Ánshi Qytaıdaǵy shyǵarmashylyq tájirıbesi kásibı turǵydan úlken mektep bolǵanyn da atap ótti.
— Keıde prodıýserler eki saǵat qalǵanda jańa án berip, sony oryndaýǵa daıyndaıtyn. Keıde múlde estimegen ándi bir saǵattyń ishinde jazyp shyǵatynmyn. Sol tájirıbe meni shyńdady. Qytaıdaǵy ustazdarym men prodıýserlerimnen alǵan bilimimdi bolashaqqa salynǵan úlken ınvestıtsııa dep esepteımin, — dedi ol.
Aıta keteıik, buǵan deıin, Roza Rymbaeva Rýhııa Baıdúkenovaǵa sáttilik tilegen edi.
