Rýhy qaýqarsyz halqy bar el eshqashan damyǵan memleket bola almaıdy — Prezıdent
ASTANA. KAZINFORM — Qazaqstan halqyn salaýatty ult dep ataýǵa bolǵanymen, bosańsýǵa bolmaıdy. Bul týraly VI Dúnıejúzilik kóshpendiler oıyndary jeńimpazdaryn marapattaý rásiminde Memleket basshysy Qasym-Jomart Toqaev aıtty.
— Barshańyzǵa málim, ult saýlyǵyn nyǵaıtý jáne adam kapıtalyn kúsheıtý memlekettiń konstıtýtsııalyq mindeti sanalady. Jalpy bul baǵytta irgeli jumystar qolǵa alyndy. Sońǵy jeti jylda elimizde 500-den astam sport nysany salyndy. Birqatary jóndeýden ótkizildi. Byltyr meniń tapsyrmammen Dene shynyqtyrý jáne sport týraly zańǵa birqatar ózgeris engizildi. Jańa zań otandyq sporttyń damýyna kúshti serpin bermek. Sonyń ishinde ulttyq sporttyń órkendeýine erekshe yqpal etedi, — dedi Memleket basshysy.
Qasym-Jomart Toqaev balalarymyz sportpen nemese dene shynyqtyrýmen mindetti túrde aınalysýy kerektigin basa aıtty.
— Bul — elimizdiń jarqyn bolashaǵynyń kepili. Osy maqsattyń jalpy ulttyq mán-maǵynasy aıryqsha. Óıtkeni dene bitimi álsiz, rýhy qaýqarsyz halqy bar el eshqashan ozyq, damyǵan memleket bola almaıdy. Bul barshaǵa belgili aqıqat. Sondyqtan sport mektepterinde oqıtyn ár balaǵa bólinetin qarajat kólemi eki esege jýyq artty, ıaǵnı 233 myń teńgeden 415 myń teńgege ulǵaıdy. Byltyr 220 myńnan astam balaǵa sport úıirmesine memleket esebinen aqysyz bardy. Osy maqsatqa 50 mıllıard teńge bólindi. Dene shynyqtyrýmen shuǵyldanatyn adamdardyń sany 8 mıllıonnan asty. Bul halqymyzdyń jartysyna jýyǵy degen sóz. Osy turǵydan alǵanda bizdi salaýatty ult dep ataýǵa bolady. Biraq bosańsýǵa bolmaıdy, — dedi Prezıdent.
Buǵan deıin Aqtóbede fýtbol stadıonyn salýǵa 6,5 mlrd teńge bólingeni belgili boldy.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
