Rýhanı jańǵyrýymyzdyń tilden bastalýy óte oryndy - Tóregeldi Tuıaqbaı
«Elbasy alǵa qoıǵan úlken jahandyq baǵdarlamanyń, rýhanı jańǵyrýymyzdyń tilden bastalǵany úshin óte qýanyshtymyz. Búgin Elbasymyz latynǵa kóshýimiz jónindegi Jarlyqqa qol qoıdy. Bul bastamany kótergen bir bólek, endi mine naǵyz iske asyratyn kez keldi. Bul kúndi qazaq eliniń, Qazaqstannyń latyn álipbıine kóshýi dep sanaý kerek. Menińshe, rýhanı jańǵyrý qaı halyqta da bolmasyn aldymen tilinen bastalýy tıis», - dedi ol.
Onyń paıymynsha, qazaq tili álipbıin kırıllıtsadan latyn grafıkasyna kóshirý ana tilimizdiń jańa bir tynysyn ashatyn bolady.
«Táýelsizdik alǵannan beri aıtyp kele jatqan, qordalanyp qalǵan qazaq tilindegi túıindi problemalardyń barlyǵy da latynǵa kóshýimiz arqyly sheshilýi tıis. Árıne, bul bir kúnde sheshile salmaıdy. Birte-birte sheshiledi. Elbasymyzdyń ózi de 2025 jylǵa deıin áli de jumys isteýmiz kerektigin, sol mejede tolyq kóshýdi aıaqtaýymyz tıistigin aıtqan bolatyn. Aldymyzda qyrýar jumystar tur. Jumyla kótergen júk jeńil deıdi. Biz muny kóp bolyp atqarýymyz kerek. Latynǵa kóshýdi talqylaýdyń ózi búkilhalyqtyq sıpatqa ıe boldy», - dedi Tóregeldi Tuıaqbaı.
