«Rýhanı jańǵyrýǵa» 1 jyl: Astanada erekshe fleshmob ótti
Baǵdarlamanyń baǵytyna qoldaý bildirip, oryndalýyna ún qosyp júrgen jastardyń fleshmoby sátti shyqty. «Rýhanı jańǵyrýdyń» sımvolyn kórsete sapqa turǵan qyrandaı qyraǵy órender «Qazaq eli» monýmentiniń mańyna erekshe kórik berdi. «Qazaqstannyń 100 jańa esimi» jobasynyń jeńimpazdary, estrada juldyzdary, blogerler arnaıy kelgen is-sharaǵa Astana qalasynyń 35 orta arnaýly oqý oryndarynyń belsendi stýdentteri men 84 mekteptiń oqýshylary, sondaı-aq «Astana jastary» JRO eriktileri qatysty.
«Bul shara Astana qalasy ákimdiginiń Qoǵamdyq damý isteri basqarmasy men «Astana jastary» jastar resýrstyq ortalyǵynyń uıymdastyrylýymen ótkizilip otyr. Jalpy, shara Elbasymyzdyń «Bolashaqqa baǵdar: rýhanı jańǵyrý» baǵdarlamasyn jarııalanǵanyna bir jyl tolýyna arnalǵan. Barsha astanalyq jastar birlesip, jınalyp, fleshmob uıymdastyrýda. Bir jyldyń ishinde baǵdarlama aıasynda aıtarlyqtaı jumystar júrgizildi. Búkil eldiń ún qosýy - bul «Rýhanı jańǵyrýdyń» ýaqytsha emes, elimizdiń bolashaǵyna kepil bolarlyq baǵdarlama ekenin kórsetedi. Fleshmobty ótkizý - jastardyń óz ıdeıasy», - deıdi «Astana jastary» JRO dırektory Muhamedjan Bolysbek.
Onyń aıtýynsha, «Astana jastary» JRO bir jyldyń ishinde birshama jumys atqarǵan. Naqtyraq aıtqanda, «Týǵan jer», «Sanaly azamat», «Jomart júrek» jobalary qolǵa alynyp, elorda órenderi el ishinde birsypyra ıgi isterge muryndyq bolǵan.
«Baǵdarlamanyń maqsaty - ulttyq kodymyzdy jańa zamanaýı talaptarǵa saı kórsetý. Sondyqtan, búgingi tańda jastardyń ıdeıasy óte jaqsy qoldaý otyrǵanyn erekshe atap ótkim keledi. «Rýhanı jańǵyrýdyń» baǵyttary boıynsha biz byltyr jas aqyndar múshaırasyn, aıtysyn ótkizip, blogerler men vaınerlermen tyǵyz jumystar bastaldy. Qalanyń ortalyq saýda ortalyqtarynda qaıyrymdylyq keshterin, qarttarǵa erikti túrde kómektesip júrgender de bizdiń jastar. Balalar úıi men qarttar úıine órenderimiz turaqty túrde barýda. Bunyń bári de elordadaǵy jas býynnyń aınalaǵa jaýapkershilikpen qaraıtynyn kórsetedi», - deıdi Muhamedjan Bolysbek.
