Rýhanı jańǵyrý: Túımebaev ardagerlerge qurmet kórsetti
«Rýhanı jańǵyrý: Bereke basy - birlik» atty jıyn jyl boıy atqarylǵan jumystarǵa baǵa berip, aldaǵy atqarylar jumystardy talqylaý maqsatynda uıymdastyryldy. Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynyń jaryq kórgenine jeti aıdan asa ýaqyt ótti. Sodan beri elimizde, onyń ishinde Ońtústik Qazaqstan oblysynda da ıdeologııa salasynda qoǵamdyq sanany jańǵyrtý baǵytynda túrli jobalar qolǵa alynyp keledi. Aýqymdy jumystar atqarylýda. Dóńgelek ústel barysynda sóz alǵan óńir basshysy Elbasy maqalasyn júzege asyrý maqsatynda 66 joba boıynsha 121 is-sharany júzege asyrý qolǵa alynǵanyn jetkizdi.
«Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý barysynda aldaǵy kezde talapty kúsheıte túsemiz. Oblystaǵy 720 myńnan astam jyljymaıtyn múliktiń kelbetin kóriktendirýge qol jetkizemiz. Álbette, bul rette sizderdiń kómekterińizge súıenetin bolamyz. Jastarymyzdyń tálim-tárbıesine, bilimine asa kóńil bólýimiz qajet. Osy turǵyda Sizderdiń qosar úlesterińiz orasan zor. «Qarty bar el - qazynaly el» degendeı, Sizder bizdiń qazynamyz bolýmen qatar, baǵyt-baǵdar beretin danalyqtyń sarqylmas bulaǵysyzdar», - dedi Janseıit Qanseıituly.
Kezdesýde oblystyq ardagerler keńesiniń tóraǵasy Jeńisbek Máýlenqulov baıandama jasap, eldi birlik pen yntymaqqa shaqyrýda ardagerlerdiń eńbegi orasan ekenin atap ótti. Ol sondaı-aq qarııalardy Elbasy maqalasynyń el arasynda óz deńgeıinde nasıhattalýyna kúsh salýǵa shaqyrdy.
«Búgingi tańda oblysymyzda qyrýar tirlikter atqarylyp jatyr. Óńirdiń áleýmettik-ekonomıkalyq damý kórsetkishteri de jyl sanap jaqsaryp keledi. Memleket tarapynan barlyq salalarǵa qoldaý qarjy men qajetti qamqorlyq kórsetilip otyr. Búgingi qoǵamnyń onyń ishinde jastar tárbıesine, otbasy qundylyqtaryn saqtaý, aýyzbirlik pen yntymaqqa shyqyrý, halyqty Elbasymyz kórsetip otyrǵan baǵyt-baǵdarmen habardar etý osynda otyrǵan barsha abyz-aqsaqaldarymyzdyń eń basty mindetteri dep sanaımyn», - dedi Jeńisbek Máýlenqulov. 
Munan soń eńbek ardagerleri men tyl eńbekkerleri, Saryaǵash aýdandyq ardagerler keńesiniń tóraǵasy men respýblıkalyq «Dostyq» ózbekter qaýymdastyǵynyń tóraǵasy Ikram Hashımjanovtar sóz sóılep, Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasyn birlesip júzege asyrý jóninde óz oı-pikirlerin ortaǵa saldy.
Aıta keteıik, búginde oblysta Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda 844 eldi mekende 3185 is-shara ótkizilgen. Maqalada erekshe atalǵan jobalardy júzege asyrýǵa 2022 jylǵa deıin 16,2 mlrd teńge bólý josparlanyp otyr. Jyl basynda «Atameken» kishi baǵdarlamasy aıasynda oblystan shyqqan 205 tulǵanyń qatysýymen «Týǵan jerdi túletý - perzenttik paryz» basqosýy joǵary dárejede uıymdastyryldy. Búgingi kúnde óńirde kásipkerler, demeýshiler tarapynan jalpy 30 mlrd. 350 mln. teńgeni quraıtyn 529 óńirlik joba qolǵa alynyp otyr.
Budan bólek, «Rýhanı qazyna» kishi baǵdarlamasy boıynsha «Ajarly úı - yrysty» jobasy aıasynda 120-dan astam belsendi, erikti jastar eldi mekenderdi abattandyrý maqsatynda kómekke zárý 543 otbasynyń aýlalaryn tazalap, qorshaýlaryn, qaqpalaryn syrlap, aýyl ajarynyń artýyna óz úlesterin qosqan.
Munan soń jıyn suraq-jaýap úlgisine kóshti. Kezdesý sońynda oblys ákimi barsha ardagerlerge syı - sııapat jasady.
