«Rýhanı jańǵyrý»: Túrkistanda 10 kitap jaryq kórdi

TÚRKІSTAN. QazAqparat - Túrkistanda «Rýhanı jańǵyrý» baǵdarlamasy aıasynda 10 kitap jaryq kórdi. Olardyń tanystyrylymy Q.A.ıAsaýı atyndaǵy Halyqaralyq qazaq-túrik ýnıversıtetiniń kitaphanasynda ornalasqan «Rýhanı jańǵyrý» jobalyq keńsesinde ótti, dep habarlaıdy QazAqparat.

Óńirdiń belgili aqyn-jazýshylary qatysqan ádebı keshti tanymal jazýshy Marhabat Baıǵut júrgizip otyrdy. Kitaptardyń tusaýkeserinde Túrkistan oblysy ákiminiń orynbasary Málik Otarbaev quttyqtaý sóz sóılep, qalamgerlerdiń qoǵamdaǵy orny erekshe ekenine toqtaldy.

«Aqyn-jazýshylar, qolyna qalam ustaǵan tulǵalar - qashan da ulttyq qundylyqtardyń nasıhattaýshylary ári qoǵamnyń tiregi. Qazir Túrkistan oblysy tarıhı kezeńdi bastan ótkerýde. Mine, osy tarıhı kezeńde qalamgerlerler qaýymynyń oblystyń damýyna qosatyn úlesi orasan zor. Bárimizdiń ılep júrgenimiz bir pushpaq. Sizderdiń oblystyń rýhanııatyna qosyp otyrǵan úlesterińiz ben eńbekterińizdi joǵary baǵalaımyn. Óıtkeni, ózim de qalamger retinde qalam ustaýdyń ne ekenin, shyǵarmashylyq adamdarynyń qalamdy terbetip otyryp qandaı azap shegetinin jaqsy bilemin. Búgin oblys ákimi Janseıit Qanseıitulynyń tikeleı qoldaýymen jaryq kórgen 10 kitap oqyrmanǵa jol tartqaly tur. Oblys ákimdigi tarapynan rýhanııatqa, ádebıetke qoldaý kórsetý jalǵasady. Bárimiz birigip jumys istep, Túrkistandy túletýge úles qosaıyq», - dedi Málik Nurjanuly.

Túrkistan oblysy ákimdiginiń baspasóz qyzmetinen málim etkendeı, kitaptar «Rýhanı jańǵyrý» baǵdarlamasy sheńberinde jaryq kórdi. Kitaptardyń avtorlary - elge belgili qalamgerler. Atap aıtsaq, Marhabat Baıǵuttyń «Arshakıe», Hanbıbi Esenqarqyzynyń «Jibek», Narmahan Begalyulynyń «Jaz-jalbyz», Isa Omardyń «Adamdyq qaǵıdasy», Mombek Ábdiákimulynyń «Zobalań», Esqara Toqtasynulynyń «Belasqan», Zahardın Qystaýbaıdyń «Júrektiń sózi», Nurǵalı Qydyrbaevtyń «Shyǵystyń Sultanbegi», Sársenbek Sahabbattyń «Qyrǵaýyl qonǵan jıdetal» syndy kitaptary oqyrmanǵa jol tartty. Sonymen birge Dáýren Aımanbetov, Muqaǵalı Kenjetaı, Álimjan Álisher, Batyrhan Sársenhan, Núrken Nurǵazy, Súndet Seıitov, Maqpal Tórebek, Araılym Muratálıeva, Aqbota Beıbitbek jáne Gúlshyryn Jumabaı syndy jas aqyndardyń shyǵarmalary «Túrkistan túlekteri» degen kitapqa toptastyrylǵan.

Ádebı ortaǵa serpilis bergen jıynda Narmahan Begalyuly, Hanbıbi Esenqaraqyzy, Qasymhan Begmanov jáne ózge de qalamgerler kitaptardyń jaryq kórýine úles qosqan azamattarǵa júrekjardy lebizderin bildirip, ádebıetin qoldaǵan eldiń bolashaǵy jarqyn bolatynyn aıtty. Túrkistan oblysynda aldaǵy ýaqytta da «Rýhanı jańǵyrý» baǵdarlamasy aıasynda aýqymdy jumystar jalǵasady.