Rýhanı jańǵyrý: Túrkistan oblysynda 6 myńǵa tarta shara uıymdastyrylǵan

TÚRKІSTAN. QazAqparat – Túrkistan oblysynda ótken jyly «Rýhanı jańǵyrý» jáne «Uly dalanyń jeti qyry» maqalalary aıasynda 5 872 is-shara uıymdastyrylyp, 376 myńnan asa adam qamtyldy. Bul týraly Óńirlik kommýnıkatsııalar qyzmetinde ótken brıfıngte oblystyq «Rýhanı jańǵyrý» jobalyq keńsesiniń jetekshisi Ǵalymjan Shyndaly málimdedi, dep habarlaıdy QazAqparat tilshisi.

Ǵalymjan Shyndalynyń aıtýynsha, óńirde «Týǵan jer» arnaıy jobasy aıasynda 100 nysan qamtylǵan.

«Týǵan jer» jobasy aıasynda júzege asqan 100 nysannyń arasynda 11 mektep, 8 balabaqsha, 7 mádenıet nysany, 16 sport alańshasy, 4 medıtsınalyq mekeme jáne 54 ózge de nysan bar. Onyń ishinde 66 nysan salynyp, 34 nysan qaıta jóndeýden ótti. Sonymen qatar, qaıyrymdylyq kómek kórsetý boıynsha oblysta «Altyn uıam» jobasy iske asyryldy. Jobanyń maqsaty - mektep túlekteriniń 10, 20, 30 jyldyq mereıtoılarynda sán-saltanattyń ornyna bilim alǵan mektebine, týǵan aýylyna kómek kórsetý boldy. Sondaı-aq, túlekter turmysy tómen otbasylarǵa baspana, túrli nysandar salyp berýge úles qosty», - dedi Ǵalymjan Ǵabıtuly.

Budan ózge, «Qazaqstannyń sakraldyq geografııasy» arnaıy jobasy aıasynda oblystyń tanymal 20 tabıǵı jáne tarıhı nysanyna, sondaı-aq «Tarıhı-ólketaný murajaıynyń» 100 eksponatyna aqparattyq QR-taqtaıshalar ornatyldy. Oblys kóleminde 154 sakraldy nysan anyqtalsa, onyń ishinde 100 nysanǵa týrıstik marshrýttar tizimine engizilgen.

«Túrkistan oblysynda «Rýhanı jańǵyrý» baǵdarlamasyn iske asyrý jónindegi 2020 jylǵa arnalǵan is-sharalardyń jospary daıyndalyp, QR Aqparat jáne qoǵamdyq damý mınıstrligimen kelisildi. Bıylǵy jylǵa arnalǵan is-sharalar jospary Baǵdarlamanyń negizgi basymdyqtaryn negizge ala otyryp, 3 baǵyttan turady. Olar tulǵany damytý, ulttyń damýy, halyqaralyq pozıtsııalaý, memlekettiń, azamattyq qoǵamnyń, jergilikti qoǵamdastyqtardyń damýy», - dep málimdedi keńse jetekshisi.

Sonymen qatar, Túrkistan oblysynyń «Rýhanı jańǵyrý» baǵdarlamasyn iske asyrý jónindegi Saraptamalyq keńestiń 2020 jylǵa arnalǵan jumys jospary quryldy. Oblystaǵy 16 aýdan, qalada óńirlik «Rýhanı jańǵyrý» keńseleri qurylyp, qazirgi tańda barlyq aýdan, qalada jumys isteıdi.